تاند (جمعه، د حمل ۳۹مه) امریکا وايی، تر څو چې طالبانو په ټولنه کې نجونو او ښځو ته د زده کړو او کار اجازه نه وي ورکړې، د دوی حکومت به په رسمیت ونه پېژندل شي.
د انډیپنډنټ ورځپاڼې د راپور له مخې، د امریکا د بهرنیو چارو وزارت مرستیال ویندوی ویدانت پاټیل په یوه خبري غونډه کې وویل، د افغانستان په اړه د امریکا په پالیسي کې د افغان ښځو او نجونو مساوي حقوق کلیدي ځای لري.
ده زیاته کړه، د طالبانو حکومت به تر هغو په رسمیت ونه پېژندل شي چې ښځو او نجونو ته یې اجازه نه وي ورکړې چې د خپل هیواد په ټولنه او اقتصاد کې ګډون ولري.
طالبانو له واک ته رسیدو وروسته له شپږم ټولګي پورته د نجونو زده کړې په دې نامه چې تر بلې خبرتیا پورې دې نجونې ښوونځیو ته نه ځي، بندې کړې، ورپسې یې له پوهنتونونو منع کړې.
د امریکا د بهرنیو چارو وزارت مرستیال ویاند دې ته په اشارې چې د افغانستان نیمايي نفوس یعني ۲۱ میلیونه ښځې دي وویل:«دا د افغانستان د پالیسۍ په تړاو زموږ په دریځ کې یو کلیدي عامل دی، او دا داسي شی دی چې موږ ورته کار کوو او ادامه ورکوو.»
طالبان د نجونو د زده کړو پر سر هم د خپلو پلویانو او هم مخالفانو له لوري له انتقادونو سره مخامخ دي او په داسي حال کې چې اکثره طالب چارواکي هم وايي چې د نجونو د زده کړو ملاتړ کوي، څو اصلي تصمیم نیوونکي طالبان اجازه نه ورکوي چې نجونې زده کړې وکړي او د دوی حکومت د افغانستان د رسمي او مشروع دولت په توګه په نړۍ کې ومنل شي.