تاند (یکشنبه، د حمل ۲۶ مه) د طالبانو د باندنیو چارو وزارت په یوه خبرپاڼه کې په دمشق کې د ایران پر کونسلګرۍ اسراییل ته منسوب برید د نړیوالو قوانینو او نورمونو خلاف بللی او د هغه په ځواب کې یې د ایران حمله مشروع دفاعي اقدام ګڼلی دی.
د طالبانو د بهرنیو چارو وزارت په خپله اعلامیه کې پر غزې د اسراییل د یرغل یادونه هم کړې او ویلي یې دي« د تېر کال له اکټوبر راهيسې صهيونيستي رژيم په غزه کې تر دري دېرشو زرو زياتو ملکيانو د نسلوژنې په دوام په سيمه کې د نورو هېوادونو د حريم د نقضولو او د ناامنۍ پراخولو په پاروونکو اقداماتو هڅه کړې چې په غزه کې له خپلو جنايتونو د نړۍ پام په بله واړوي.»
د طالبانو حکومت په عین حال کې له ټولو اغېزمنو هیوادونو غوښتي چې د کړکېچ د لا پراختیا د مخنیوي لپاره د اسراییل رژیم د جنایتونو د درولو لپاره هلې ځلې وکړي.
د روان حمل په ۱۳ مه په دمشق کې د ایران پر کونسلګرۍ د برید له وخته، چې د قدس ځواک د قوماندان محمدرضا زاهدي په شمول د سپاه پاسداران ۷ جګپوړي افسران پکې ووژل شول، د ایران له لوري پر اسراییل د غچ اخیستونکي برید احتمال ورکول کېده.
د تېرې شپې له بریدونو وروسته د ایران د وسله والو ځواکونو لوی درستیز محمد باقري نن اعلان وکړ چې د ایران له لوري پر اسراییل د بې پېلوټه الوتکو او توغندو بریدونه د ایران له نظره پای ته رسیدلي او ایران د نورو حملو نیت نه لري.
ده ادعا کړې چې په دې بریدونو کې د اسراییلو نواتیم هوايي اډه او د اسراییل په شمال کې یوه اډه په نخښه شوي چې دواړه د پام وړ ویجاړې شوي او له کاره لوېدلې دي.
اسراییل وايي چې د دې بریدونو په ترڅ کې له ایران، عراق او یمن څخه د دغه هیواد لور ته تر ۳۰۰ ډېرې بې پېلوټه الوتکې او توغندي وتوغول شول چې تر ۲۰۰ ډېر توغندي یې بالستیک او کروز وو چې د ایران له خاورې وروویشتل شول.
له دې بریدونو وروسته، چې د ایران د سپاه پاسداران د هوايي ځواکونو له لوري وشول، اسراییل وویل چې پوځ یې له خپلو متحدانو سره یوځای د ایران له لوري د ۹۹ سلنه ویشتل شويو توغنديو او بې پېلوټه الوتکو مخه نیولې او په هوا کې یې ویجاړ کړي دي.
سل په سلو کې نه یوازي مشروع بلکي اصل جهاد ده د بشریت او د الله جلااالله ددښمن لعنتي سیهونیستي یهودو په ضد 👍