تاند (جمعه، د حوت ۴ مه) د طالبانو د بهرنیو چارو وزارت سیاسي مرستیال عباس ستانکزی، د دوی د رژیم مخالفانو ته په خطاب کې وایي چې رژیم یې ځواکمن ځواکونه لري او دا ګومان دې نه پرې کیږي، چې د جګړې وس نه لري.

نوموړي یوې غونډې ته د خبرو پر وخت ویلي:  « موږ ټولو دښمنانو که کورني وي او که بهرني وي، وایو چې داسې فکر او تېروتنه ونه کړي چې په افغانستان کې څلویښت کاله او یا پنځوس کاله جګړه وه او دوی ستړي شوي دي. اسلامي امارت ډېر پیاوړي ځواکونه لري.»

له دې سره، ستانکزی چې د طالب چارواکو په لیکه کې یو اصلاح غوښتونکی مقام ګڼل کیږي، خپلو هم لیکه کسانو ته په سیاسي برخه کې د بریالیتوب غږ کوي او وایي چې که دوی سیاسي بری خپل کړي، رژیم به یې ورسره دوام پیدا کړي

ستانکزي په واضح ډول نه دي ویلي، چې طالب چارواکي په سیاسي برخه کې ماتې سره مخ دي، خو هغه تر دې مخکې د نجونو د زده کړو په ګډون په ځینو مسایلو کې د دوی د رژیم کړنې نقد کړې دي.

د ستانکزي له څرګندونو ښکارېدل، چې د طالب ځواکونو لخوا خلکو سره د ناوړه چلند ادعاوې په ضمني ډول تاییدوي او ورته خواشینی دی.

هغه زیاتوي، هېڅ امنیتي سرتېری حق نه لري چې، د محکمې له حکم پرته څوک ووهي او یا یې هم بندي کړي او پر مسوولینو یې غږ وکړ څو له خلکو سره مناسب چلند وکړي.

نورو طالب چارواکو د ستانکزي څرګندونو ته غبرګون نه دی ښودلی.

د طالبانو د بهرنیو چارو وزیر ملا امیرخان متقي بیا په خپلو خبرو کې تل د سیاسي بریالیتوب ادعاوې کوي.

دا په داسې حال کې ده، چې طالب چارواکي د ملګرو ملتونو په کوربه توب په دوحه کې د افغانستان په اړه مهمه غونډه کې د خپل ګډون په اړه دغه نړیوال سازمان سره هوکړې ته په نه رسېدو له دې امله نیوکو سره مخ شوي.

پر دې سربېره، د یادې غونډې بلل د طالبانو منتقدان د طالب چارواکو ناکامي او نړیوالو او افغانانو سره په کړو ژمنو کې پاتې راتلل بولي.

د دوی په وینا، که طالبان د یوه قانونمند، مسوول او متخصص حکومت په جوړولو بریالي شوي وای، هم به افغانان ترې راضي وای او هم به یې د ملي مشروعیت په لرلو سره نړیوال مشروعیت په اسانۍ پیدا کولای شو.