تاند (سې شنبه، د حوت ۱ مه) راپورونه وایي چې پاکستاني پوځیانو د بلوچستان ایالت په چمن کې پر پرلت کوونکو برید کړی او درې کسان یې ټپیان کړي دي.
د خپرو شویو معلوماتو له مخې، پر پرلت کوونکو اوښکې بهوونکی ګاز هم شیندل شوی دی.
چمن کې د سپین بولدک پر دوازه د تګ راتګ په موخه د پاسپورټ او یزې د جبري کېدو په غبرګون کې د تېرو څلورو میاشتو راهیسې پرلت روان دی.
پاکستاني چارواکو او د یاد شوي پرلت مسوولینو په دې اړه څه نه دي ویلي.
پاکستان له څو میاشتو راهیسې پر چمن – سپین بولدک لارې د بې پاسپورټه او بې ویزې کسانو پر تګ راتګ بندیز ولګاوه، چې سختو مخالفتونو سره مخ شو.
د دې پرېکړې پر ضد د چمن زرګونه پښتنو ملتپالو له څو میاشتو راهیسې اعتراضي پرلت وهلی.
څو ورځې مخکې د طالبانو د بهرنیو چارو وزارت سیاسي مرستیال عباس ستانکزي هم وویل، چې دوی نه ډیورنډ کرښه او نه د پاکستان لخوا د پاسپورټ او ویزې جبري کول مني.
د طالب چارواکو او د چمن پرلت د ګډونوالو له مخالفت سره- سره پاکستان هم دغه هېواد ته د بې پاسپورټه او بې ویزې افغانانو ورتګ منع کړی او هم په پاکستان کې د بې اسناده افغان کډوالو د ایستو له دوام سره، ان اسناد لرونکي کسان وباسي او ستونزې ورته جوړوي.