تاند (شنبه، د جدې ۹ مه) د نيمروز لپاره د طالبانو والي، شيخ محمد قاسم خالد له يو شمېر سوداګرو، صنعت کارانو او د ښاري نظم کمېټې له غړو سره د لیدنې پرمهال په دغه ولایت کې د بهرنیو اسعارو د راکړې ورکړې پر بندېدو ټینګار وکړ.
شیخ محمد قاسم خالد د یادې ناستې موخه د ښاري نظم د کمېټې د پرېکړو شریکول یاد کړل او ويې ویل چې له دې وروسته به په بهرنیو اسعارو راکړه ورکړه نه ترسره کېږي او باید د خپلې ملي سکې «افغانۍ» څخه کار واخیستل شي.
شیخ خالد همدا راز وویل چې د ښار ټولې لوحې باید اصلاح او د پردیو کلماتو د کارونې څخه مخنیوی وشي او د اعلاناتو ټولې لوحې باید د هېواد په رسمي او یا محلي ژبو سره ولیکل شي.
نوموړي د صنعت او سوداګرۍ په تړاو هم خبرې وکړې او ویې ويل چې په دې برخه کې د طالبانو رژیم ډېرې اسانتياوې رامنځته کړې دي او له سوداګرو او صنعتکارانو يې وغوښتل چې د شريعت له اصولو سره سم خپل سوداګري او صنعت پراخ کړي.
سوداګرو او صنعتکارانو د افغانۍ د ارزښت د لوړولو او د تابلوګانو له اصلاح څخه د ملاتړ په ترڅ کې په دې برخه کې ستونزې او وړاندیزونه شریک کړل او د حل غوښتنه یې وکړه.
نیمروز د ایران په ګاونډ کې پروت دی او ویل کیږي چې لا هم پکې ایراني تومان چلیږي او پر لوحو او تابلوګانو د ایران فرهنګي اغېز لیدل کیږي.