تاند:( سې شنبه، د لړم دویمه) د جمیعت ګوند یوې مشهورې څېرې محمد یونس قانوني په یوه مرکه کې د یاد شوي ګوند د وژل شوي موسس برهان الدین رباني په ګډون خپل هغه ګوندي منتقدین له سختو نیوکو سره مخ کړل، چې پر ده یې په دې خاطر نیوکې کړي چې د طالبانو د لومړني رژیم له سقوط وروسته یې له رباني څخه حامد کرزي ته د واک د انتقال دزمینه برابره کړې ده.
ښاغلي قانوني د آمو په نوم د رسنۍ له خبریال سمیع مهدي سره په یوه ننګونه کې په دې اړه جدي بحثونه لرل.
د مرکې ترسره کوونکی، چې د جمیعت ګوند د رهبرۍ شورا د غړي محی الدین مهدي زوی دی، په دې مرکه کې هڅه کوله چې د جمیعت ګوند د یوه مدافع په توګه یونس قانوني وننګوي.
هغه څو ځایه په دې برخه کې خپله د ښاغلي قانوني پر وړاندې د یوه مخالف شاهد رول ولوباوه او په ځینو شخصي مجلسونو کې یې د قانوني د هغو خبرو نقل قولونه وړاندې کول، چې په وینا یې د ده په موجودیت کې یې د جمیعت ګوند د کمزوري ښودلو په اړه کړې وې.
ښاغلي قانوني بیا په لومړي ځل د برهان الدین رباني په ګډون په جمیعت ګوند کې خپل ډېر منتقدان وننګول او ویې ویل، چې د طالبانو له لومړي سقوط وروسته په کابل کې د رباني او جمیعت ګوند او واکمنۍ ټول قوت او کنټرول د ښار تر څلورو حوزو محدود و او دی نه پوهیږي چې مخالفان یې دی د کوم اقتدار په معامله کولو تورنوي.
د قانوني په وینا، که د رباني د ولسمشرۍ یو فیصد چانس هم وای، دوی به په بن کې د حامد کرزي په موقت حکومت موافقه نه وای کړې.
قانوني په ورته مهال د جمیعت ګوند له نورو اختلافاتو هم پرده پورته کړه او وویل، په ۲۰۰۴ کې چې حامد کرزي له خپل ټاکنیز ټیم څخه د قسیم فهیم د ایستو او پرځای یې د احمدشاه مسعود د ورور احمد ضیا مسعود د راوستلو پریکړه وکړه، دوی په ګډه له کرزي سره د پریکون فیصله وکړه او ضیا مسعود ومنله چې د کرزي ټیم ته به نه ځي، خو په وینا یې برهان الدین رباني او ضیا مسعود له دې پریکړې په شا شول.
یونس قانوني چې د ۲۰۰۱ په ین کنفرانس کې د جمیعت ګوند د پلاوي مشري کوله، د جمهوري نظام د سقوط په ورځو کې پاکستان ته د خپل سفر په اړه هم وضاحت ورکړ او ویې ویل چې د احمد شاه مسعود زوی احمد مسعود ورسره یو ځای په دغه سفر کې د ګډون پریکړه کړې وه، خو وروسته له دې امله ورسره ملګری نه شو، چې ویل یې تره او خسر یې احمد ولي مسعود په سفر کې شامل دی او د هغه په موجودیت کې به ده ته اړتیا نه وي.
دا لومړی ځل دی چې یونس قانوني په دومره صراحت د جمیعت ګوند له کمزوریو پرده پورته کوي او خپلو ګوندي منتقدانو ته د هغو تورونو ځواب وایي، چې دی یې پرله پسې د کرزي په حکومت کې د وزارت د مقام لرلو لپاره د دوی په باور د خپل« اقتدار» په معامله کولو تورنوه.