تاند: (یکشنبه، د زمري ۲۹ مه ) د طالبانو د دفاع وزارت سرپرست مولوي محمد یعقوب مجاهد ویلي، دوی په خپل ټول توان سره هڅې کوي چې افغانستان بيا د جنګ جګړو او تاريکیو لوري ته ور ونه ګرځي.
د طالبانو تر واک لاندې باختر اژانس لیکلي، چې هغه دا خبره پرون له پخواني برېتانوي ښکېلاک څخه د افغانستان د ازادۍ د ۱۰۴ مې کلیزې د نمانځنې په مراسمو کې کړې ده.
دغه طالب چارواکي نه دي ویلي، چې په افغانستان کې د جګړو د بیا تکرار اندېښنه لري کنه؟
د طالبانو د واکمنۍ له دوه کلنۍ سره، د دوی یو زیات شمېر مخالفان د خبروله لارې د افغانستان د ستونزو له حل څخه نهیلي ښکاري او وخت په وخت یې ځینې مطرحې څېرې د جګړې خبرداری ورکوي.
طالبانو مخکې دا ډول خبرداري بې ځایه تبلیغات بللي، خو منتقدان یې باور لري چې که طالبان د واک انحصار او نه مشروعیت، د خلکو او په خاص ډول د ښځو د حقونو نقض او د افراطي کړنوله دوام سره د نړیوال تعامل نا ممکن توب ته دوام ورکړي، پایلې به یې خطرناکې او مسوولیت به یې د دوی پر غاړه وي.