تاند: ( جمعه، د سرطان ۱۶ مه) د هوا پېژندنې ادارې نن او سبا په ۱۷ ولایتونو کې د بارانونو او سېلابونو وړاندوینه کړې ده.
یاده اداره وایي: د چنګاښ مياشتې په ۱٦ مه او ۱۷ مه بدخشان، نورستان، لغمان، ننګرهار، کونړ، کابل، لوګر، پکتيا، خوست، پکتيکا، غزني، ميدان وردګ، زابل، باميان، پروان، کاپيسا او پنجشېر ولايتونو کې د باران او سېلابونو راوتلو وړاندوینه شوې ده.
سرچینې په دغو ولایتونو کې له بارانونو او سېلابونو خطر لرونکو کورنیو ته د ځان خوندي کولو سپارښتنه هم کړې ده.
افغانستان په وروستیو دوو کلونو کې د طبیعي پېښو زیاتو زیانونو سره مخ شوی.
د طالبانو د رژیم چارواکوله نړیوالې ټولنې بیا- بیا غوښتي، چې د دوی رژیم سره د سیاسي ستونزو له نظر کې نیولو پرته، په افغانستان کې د اقلیمي زیانونو د مقابلې لپاره پلان کړې پروژې مخته یوسي.
د طبیعي پېښو زیانمن خلک بیا له طالبانو ګیله لري، چې د دوی ستونزو ته یې لازمه پاملرنه نه ده کړې.