تاند: ( جمعه، د سرطان نهمه)  د ترکیې – ایران له پولې د ایراني رسنیو راپورونه وایي چې ترکي پوله ساتونکو، خپلې خاورې ته په نا قانونه توګه اوښتونکي ۲ افغان پناه غوښتونکي وژلي.

سرچینې وایي، د افغان پناه غوښتونکو یوې ډلې د قاچاقبرانو له دروغجنې وعدې سره د ترکیې خاورې ته د ننوتو هڅه کوله چې ویل یې د لوی اختر په شپو او ورځو کې به د پولو ساتنه کمه شي.

د ځايي سرچينو د معلوماتو له مخې، په دې ډله کې شاوخوا ٢٥٠ افغان کډوال شامل وو، چې د ډزو په پايله کې یې دوه تنه وژل شوي او يو شمېر نور ټپيان دي.

له ترکیې څخه یوه شړل شوي تازه دمه افغان کډوال ترکیې ته په ناقانونه توګه د افغان پناه غوښتونکو د اوښتو په اړه ویلي: قاچاق وړونکي کډوال د پولې صفري نقطې ته له ۱۰۰ څخه تر ۳۰۰ کسانو په لویو ډلو کې د اغزن سیم په پرې کولو سره لیږي. په تارونو او زینه ایښودلو سره لاره بندوي او له پولې د تیریدو زمینه برابروي خو د ترکیې د پوله ساتو ځمکني او هوايي څارنې او د هغوی ډزې هر وخت د ګڼ شمیر مهاجرینو د وژل کیدو او ټپي کیدو سبب کیږي.

د ترکیې حکومت او د طالبانو رژيم په دې اړه څه نه دي ویلي.

په وروستیو کې له ترکیې څخه د افغان کډوالو پر وړاندې د ناوړه چلند راپورونه بیا زیات شوي.