د کاوون توفاني لس شعري ټولګې په دوو ټوکونو کې چاپ شو. د دې اثر د تدوین چارې د سید اصغر هاشمي تر سره کړي دي او په جلال اباد کې هاشمي کتابخانې چاپ کړی دی.
دغه اثر په دوو ټوکونو کې چاپېږي او لس شعري ټولګې لري، په دغو شعري ټولګو کې ځینې یې مخکې چاپ شوي وو او ځینې یې ناچاپ وو. سپرغۍ پر (۱۳۶۲) کال، د تیږو په ذهن کې په (۱۳۶۳)، شګې او ګلونه په (۱۳۶۶)، وروستۍ ټکی په (۱۳۶۷)، کله چې ونې مري په (۱۳۷۰)، د باد په کډواله کې په (۱۳۸۱) او مرثيې د چنارونو په (۲۰۲۱) لمریز کلونو کې چاپ شوي وو او ایینې د سرابونو، څلور منظومې او ازادې مرغۍ یې چاپ شوې نه وې، خو چاپ ته چمتو وې چې دغه لس شعري ټولګه په دې اثر کې را ټول شوې دي. دغه ټولګې مو پیدا کړې او د ټایپ کار یې موږ تر سره کړ، د (۱۳۶۰) کلونو ټولګې پر ماشین باندې ټایپ شوې وې چې بیا ځلې ټایپ کول یې ستونزمن کار وو، خو موږ تر سره کړ؛ اته ټولګې یې له سره ولیکل شوې. کله چې دغه ټولګې ولیکل شوې، دغه لیکل شوی دوه ټوکه اثر له لسو پخوانیو ټولګو سره په پرتلیز ډول وکتل شو او سم مو کړ. پخواني چاپ شوي کتابونه د ټایپ په برخه کې ستونزې درلودې او کله چې موږ اثار ټایپ کړل، زموږ څخه هم ځینې تېروتنې تېرې شوې وې چې په پرتلیز ډول له لوستلو او کتلو څخه وروسته ډېرې ستونزې هوارې شوې. له ټایپ، سمونې او پرتلنې څخه وروسته مو سیټینګ وکړ. موږ د خپل کار یادونه ځکه وکړه چې لوستونکي پوه شي چې موږ کوم کارونه کړي دي. د کتاب د محتوا په اړه محمد اکبر کرګر یوه مفصله لیکنه وکړه او ما (سید اصغر هاشمي) د کاوون د شعرونو نوې خواوې وسپړلې او نویو څېړونکو ته مو لارښوونه وکړه چې پر کومو خواوو یې څېړنه وکړي.
په درنښت
دروند اومنلی هاشمی صاحب، السلام علیکم .
د کاوون صاحب د اشعارو د دغی ټولګې د چاپ او نشر له امله تاسو، درانه صدیق کاوون او ټولو هیوادوالو ته مبارکی وایم. دا زموږ لپاره یو ډیر د خوښۍ زیری دی. خدای وکړی اقلاً یو ټوک یی ترلاسه کړای شم.
تاسو ته یو وړاندیز لرم. څو ورځی وروسته کولن کی یوه فرهنګی غونډه ده، دوی سره رابطه وکړئ چی جرمنی کی د پښتو ناشرانو یو استازیتوب او دفتر ولری او زیاتره وخت جرمنی کی د کتابونو نندارتونونه جوړیږی، ما خپله څوارلس کاله مخکی دوه ځلی دغه ډول نندارتون وکوت، بوخوم او هامبورګ ښار کی ایرانیان فرهنګی چارو کی ډیر فعال دی، زه به زیاتره وخت د دوی یو کتابتون ته چی اونۍ کی به دری ورځی هلته ادبی بنډار او د کره کتنی غونډې لرلی ورتلم. د دوی تجربه موږ ته ډیره ګټوره ده، تیر کال هم ایران هامبورک کی د کتابونو یو نندارتون جوړ کړی و، له نیکه مرغه له کابل څخه قدرمن ډاکتر صاحب عازم پکی برخه واخیسته، خو کتابونه یی ډیر کم و. دغه نندارتو ته لږ افغانان راغلی و ، علت یی د اعلانونو نشتوالی و، کیدای شی دا ډول اعلانونه د افغانی ویبیسایتونو او انترنشنل افغانستان له خوا نشر شی . هیله ده تاسو دی برخه (دکتابونو نندارتو کی برخه اخیستو)کی دوهم ګام اوچت کړئ. په تیره بیا چی اوس د ۱۴کاله مخکی په پرتله زیات افغانان جرمنی ته تللی او زیاتره فرهنګیان او ژورنالیستان هم په دوی کی شته او کتاب پسې سرګردان وی. زه یقین لرم که تاسو له دغه کتاب او د کرګر صاحب او سوله مل صاحب، انځور، ننګیال…. او دی ته ورته نورو لیکوالو کتابونه جرمنی ته ولیږدوی د ډیرو هیوادوالو هرکلی سره به مخ شئ. اروپایی هیوادو کی له ادبیاتو پرته، دتاریخ کتابو پسې دیر خلک سرګردان دی. د غبار د( افغانستان درمسیر تاریخ) پښتو ژباړه د ارواښاند نصیر عبدالرحمن زوی سره سافت کی شته، له هغه څخه یی واخلئ طبع یی کړئ.
یو بل وړاندیز دا چی: یو شمیر هغه پخوانی نشر شوی کتابونه چی هغه وخت یا دلینو ټایپ یا د ټایپ ماشین په واسطه لیکلی شوی و، او ناشران یی بیا بیا نشروی، له بده مرغه تر پخوا اوس تیروتنی ډیری لری، د دی مانا داده چی پخوا ډیر دقت و، هیله ده تاسو خپه نشئ، موخه می ستاسو د کار نه و. بلکی نور و. زه یقین لرم چی تاسو پوره دقت کوئ او کاشکی مو مخکی له طبع یوځل د لیکوال/ شاعر له نظره تیر کړی وای. که یو ناول در واستوم د نشر امکان یی شته ؟ البته کولای شئ یو ځل یی وګورې او د بازار وضعیت ته په کتو ډاډ راکړئ. له بلی خوا بهر؛ خصوصاً آلمان کی د نمانیدګی یا دکتابونو نندارتون کې د ګډون دغه وړاندیز نورو ناشرانو لکه اکسوس، مستقبل، ګودر، ختیځ او نورو ته هم ورسوئ، کیدای شی تاسو په ګډه یوې پایلی ته ورسیږئ. هیله ده له نږدې مو هم ووینم. درناوی
ستاسو ټولې خبرې سمې دي. زه به په دې برخه کې له انځور صاحب او ځینو نورو ملګرو سره مشوره وکړم چې څنګه دا کار وکړو.
ناول مو ولیږئ، نورې خبرې به وروسته وکړو.
[email protected]