تاند:( جمعه ، د جوزا ۱۹ مه ) د امریکا د کانګرس د بهرنیو اړیکو د کمیټې مشر مایکل مک کال د بهرنیو چارو وزیر انتوني بلینکن ته یوه اونۍ وخت ورکړی چې له افغانستانه د وتلو د څرنګوالي په اړه بشپړ اسناد وړاندې کړي.
نوموړي خبرداری ورکړی چې که بلنکن په دې اړه د دوی غوښتنه ونه مني، کانګریس ته به احضار شي.
په لیک کې راغلي چې د امریکا د بهرنیو چارو وزارت په دې کې پاتې راغلی چې د کمېټې د څېړنو لپاره له درې برخې غوښتل شویو اسنادو څخه دوه برخې یې برابر کړي.
تر دې مخکې مک کیل له بلنکن سره د دې هوکړې له مخې اعلان کړی و چې له افغانستانه د امریکايي ځواکونو پر وتلو د بیا کتنې د کمېټې ټول غړي به په دې اړه ټولو محرمو اسنادو ته لاسرسی ولري.
د امریکا د بهرنیو چارو وزارت په دې اړه کوم غبرګون نه دی ښودلی.
د امریکا د ولسمشریزو ټاکنو له را رسیدو سره، له افغانستانه د دغه هېواد نامسوولانه وتل، یوه مهمه کمپایني ناندرۍ ګڼل کیږي.