تاند:( چار شنبه ، د جوزا ۱۷ مه ) په بغلان کې د اطلاعاتو او کلتور ریاست له لوري د سالنګ زمزمې مشاعره او د سرود درد شعري ټولګې مخکتنه وشوه.
په دې مشاعره کې د یاد ولایت د اطلاعاتو او کلتور طالب رییس مولوي اسدالله مصطفی هاشمي له شاعرانو وغوښتل چې د وخت او حالاتو د غوښتنو سره سمه شاعري ترسره او دغه راز دې د افغاني ژبو د ادبیاتو د ودې هڅه وکړي.
هاشمي زیاته کړه، د سرود درد شعري ټولګه هم د اطلاعاتو او کلتور ریاست په هڅو چاپ شوې او په کې چاپ شوي شعرونه د هېواد ناخوالې، ټولنیز تصویرونه او د ټولنې ناوړه دودونه په کې په منظوم ډول وړاندې شوي دي.
په دې مشاعره کې د بېلابېلو ژبو لسګونو شاعرانو، فرهنګیانو او استادانو د ترنم ترڅنګ شعرونه وویل.
طالب چارواکي وایي، چې د سالنګ زمزمې کلنې مشاعره به وروسته تر دې هر کال په بغلان ولایت کې ترسره کېږي.