تاند:( یکشنبه ، د غویي ۴ ) د کلتوري خبرونو یو شمېر اړوندو نړیوالو رسنیو راپور ورکړی چې یونسکو د بامیان د تاریخي ابداتو د ساتنې لپاره د یوې نوې پروژې د پيل تابیا کړې ده.
هنر ورځپاڼې د بامیانو د جامع ستراتیژیک پلان د همغږي کوونکي “میرلا لودا” په حواله لیکلي چې دا پریکړه د افغانستان د کلتوري میراثونو په ساتنه کې مرسته کوي.
دغې ورځپاڼې چې دفتر یې په لندن کې دی، پرون د یونیسکو د یوه ویاند له خولې راپور ورکړ چې د بامیانو د کلتوري میراثونو د ساتنې د پروژې پلي کول به په سیمه کې له اقتصادي ثبات سره مرسته وکړي.
د باميانو د تاريخي ابداتو د ساتنې لپاره د څو ميليونو ډالرو په ارزښت پروژه چې د ايټاليا په مالي مرسته پيل شوې وه، د ١٤٠٠ کال د اګسټ په ٢٤مه د طالبانو له بيا واک ته رسېدو وروسته ودرول شوه.
د راپور له مخې، په هغه کنفرانس کې چې د تېر کال د نوامبر په میاشت کې د ایټالیا د فلورېنس په پوهنتون کې جوړ شوی و، د ایټالیا د بهرنیو چارو وزارت اعلان وکړ چې هېواد یې له دې پروژې سره د مالي مرستو د دوام پرېکړه کړې ده.
په دې کنفرانس کې چې د فلورېنس پوهنتون په نوښت او د ايټاليا د پراختيايي همکاريو ادارې په نوښت جوړ شوى و، د افغانستان د فرهنګي ميراثونو په اړه د نظريو د تبادلې په موخه د نړۍ له ګوټ ګوټ څخه کارپوهانو برخه اخيستې وه.
په دې کنفرانس کې د بامیان ولایت فرهنګي میراثونه چې په ۱۳۸۲ کال کې د یونسکو له خوا د نړۍ له خطر سره د مبارزې د میراثونو په لست کې شامل شوي وو، ځانګړې پاملرنه او ټینګار وشو.
همدارنګه د “آرټ نیوز” خپرونې چې په نیویارک کې دفتر لري، په یوه راپور کې لیکلي چې په بامیانو کې د یونسکو د پروژې هدف د تاریخي ابداتو د زیربناوو پیاوړتیا او د اوږدمهاله ساتنې د پلان جوړول شامل دي.
د آرټ نیوز په وینا، دا پروژه د سیمې د تاریخي ابداتو په ساتنه کې مرسته کوي او د سیمې اوسیدونکو ته د اوږد مهاله کارموندنې بنسټ جوړوي.
دغه هنري خپرونه زياته کړه چې د يونسکو د دغې پروژې تمرکز د هغو ډبرو په ساتنه کې دى چې د باميانو د تاريخي ابداتو يوه برخه ده، چې په هغو کې د باميانو له منځه تللې څېرې او په هغو کې جوړ شوي ګڼ شمېر غارونه او همدارنګه د غلغلې لرغوني ښار شامل دي.