تاند:( سې شنبه، د حمل ۱۵ ) د روسيې د مرکزي ځواکونو مطبوعاتي دفتر ویلي، چې د روسيې او تاجکستان پوځي کنډکونو د تاجکستان په “حرب ميدان” کې چې له افغانستان سره په پوله په شل کيلومترۍ کې موقعيت لري، ګډ تمرينات پيل کړي.
د سرچینې د معلوماتو له مخې، دغه تمرینات به د اپريل تر اوومې نېټې دوام وکړي.
په دغه راپور کې ويل شوي دي: د عملياتي پړاوونو په بهير کې به د روسيې او تاجکستان ځواکونه په غرنيو سيمو کې د ګډو عملياتو په ترسره کولو سره د ناقانونه وسله والو ډلو خطرونه له منځه یوسي.
راپور زیاتوی: په دغه تمرین کې د روسیې پوځی ډله چې د ۲۰۱ میلادی کال له پوځی اډې څخه تر ۳۰۰ زیات پرسونل پکې برخه لری، د هغوی په تجهیزاتو کې موټری پیاده ځواکونه، زغره وال ځواکونه، توپخانې، د کیمیاوی او بیولوژیکی وسلو د ساتنې ځواکونه او جنګي ځواکونه شامل دی.
په تاجیکستان کې د ۲۰۱ پوځي اډه، د روسې تر ټولو لویه بهرنۍ پوځي اډه ده.
دغه پوځي اډې د دوشنبې او باختر په ښارونو کې موقعیت لري. د ۲۰۱۲ کال په اکتوبر میاشت کې د لاسلیک شوي تړون له مخې په تاجکستان کې د روسیې پوځي اډه به تر ۲۰۴۲ کال پورې په دغه هېواد کې پاتې شي.
د يادونې وړ ده، چې د افغانستان د نورو ګاونډيو پر خلاف، چې له افغان حکومت سره ښې اړيکې لري، تاجکستان تر اوسه له کابل سره اړيکې نه دي ټينګې کړي او د افغانستان پولې ته څېرمه يې خپل پوځي ځواکونه هم پراخ کړي دي.
یاد شوی هېواد د طالبانو د مخالفې جنګي ډلې ملي مقاومت جبهې ملاتړ کوي او د طالبانو رژیم تورنوي، چې د افغانستان له خاورې یې تاجیکستان ته د وسله والو ډلو د خطر مخه نه ده نیولې.
طالبان په دې اړه ادعاوې بې بنسټه بولي او تاجیکستان د افغانستان په کورنیو چارو کې په مداخلې تورنوي.
له دې سره، په وروستیو کې د طالبانو او تاجیکستان د اړیکو د بیرته ښه کیدو اوازې دي او تمه کیږي، چې یاد شوی هېواد به ژر د طالبانو د مخالفانو په لاس کې موجود د افغانستان سفارت طالبانو ته وسپاري.
طالبانو د وروستیو پوځي تمریناتو په اړه څه نه دي ویلي.