تاند:( شنبه، د کب ۲۰) ملګرو ملتونو د افغانستان له څه باندۍ ۲۳ میلیونه فقر ځپلو سره د 4.6 میلیارده امریکایي ډالرو د مرستې غوښتنه کړې ده.
دغه سازمان ویلي، چې نړیوال باید د دغو مرستو په تنظیم کې ورسره مرسته وکړي.
ملګرو ملتونو ویلي دي چې په راتلونکو شپږو میاشتو کې به د خپلو بشري پروګرامونو د عملیاتي بهیر په اړه پریکړه وکړي.
تېر کال ملګرو ملتونو په افغانستان کې د بشري ناورین سره د مقابلې لپاره د ۴،۶ میلیارده ډالرو غوښتنه کړې وه، چې ۵۹ سلنه یې د مرستندویانو له خوا ورکړل شوې وه.
د ملګرو ملتونو خبرپاڼه وايي: “په بشردوستانه مرستو کې د ښځو له ګډون څخه انکار به د ټولو اړو خلکو لپاره ویجاړونکي او اوږدمهاله پایلې ولري، په ځانګړې توګه د ښځو او نجونو لپاره، چې د ټولنې ترټولو زیانمنونکي غړي دي.”
د طالبانو رژیم په پرله پسې ډول له نړیوالو غواړي، چې افغانستان سره بشري مرستې وکړي، خو په دې برخه کې یې د خپلو پارونکو ګامونو په اړه د نړیوالو غوښتنو ته مثبت ځواب نه دی ویلی.
طالبانو د نجونو او ښځو پر زده کړو او کار بندیز لګولی، چې نړیوال او افغانان یې ټول په غوسه کړي.
نړیوالو خبرداری ورکړی، چې د طالبانو د داسې افراطي پریکړو نه لغوه کیدل به له افغانستان سره د نړیوالو مرستو د پرې کیدو او کمیدو سبب شي.