تاند:( شنبه، د دلوې اوله) د کابل – جلال آباد د دویم لین سړک د ترمیماتي پروژې کار د ۲۴.۵ میلیونه افغانیو په ارزښت بشپړ او ګټې اخیستنې ته وسپارل شو.
د طالبانو د رژيم په یوه اعلامیه کې راغلي، چې د دوی د ټولګټو وزارت له لوري، د کابل ولایت د خاک جبار ولسوالۍ په غازي سیمه کې د کابل – جلال آباد، د دویم لین سړک د ویجاړو برخو د ترمیم او ۱۴۹ متره استنادي دیوالونو د بیارغونې پروژې کار بشپړ او په رسمي ډول د ګټې اخيستو وړ وګرځيدې.
سرچینه زیاتوي:« د کابل په خاک جبار ولسوالۍ کې د کابل – جلال آباد د دویم لین سړک، چې د طبعي پیشو له امله ویجاړ شوی و، د ترمیم کار یې د ټولګټو وزارت له لوري له یوه قراردادي شرکت سره د شاوخوا ۲۴.۵ میلیونه افغانیوپه ارزښت قرارداد شوی وه، چې اوس مهال یې چارې بشپړي او ګټې اخیستنې ته وسپارل شو. »
طالب چارواکو ویلي، چې د یادې ترمیماتي پروژې له بشپړېدو سره به د کابل – جلال آباد د دویم سړک له ویجاړېدو څخه مخنیوی وشي او د خلکو د تګ راتګ ستونزې به د پخوا په پرتله هوارې شي.
دا په داسې حال کې ده، چې د جمهوري نظام پر مهال د کابل -جلال اباد دويم سړک له پراخې بودیجې او عملي هڅو سره د هغه وخت د چارواکو په وينا، د طالبانو د وسله وال مزاحمت له امله نیمګړي پاتې وو.