تاند(جمعه، د جدي ۲۴ مه) د اسلامي همکارۍ سازمان غواړي چې افغانستان ته د دیني عالمانو یو پلاوی واستوي څو له طالب مشرانو سره د ښځو د تعلیم اوکار د حق په اړه خبرې وکړي.
دا پرېکړه په جده کې د اسلامي همکارۍ سازمان په هغه فوق العاده غونډه کې شوې چې د ترکیې او سعودي په نوښت رابلل شوې وه چې د طالبانو د حکومت له لوري له لوړو زده کړو او په ناحکومتي موسسو کې د ښځو د کار د بندیز په اړه پر اندېښنو خبرې وکړي.
د اسلامي کنفرانس عمومي منشي حسین براهیم طه غونډې ته وویل، پلاوی به د افغان ښځو او نجونو د تعلیم، کار او د ټولنیز عدالت په شان د اساسي حقونو په وړاندې د طالبانو په اقداماتو تمرکز وکړي ځکه چې دا حقونه د اسلامي نړۍ لپاره لومړیتوب لري.
د طالبانو له لوري د نجونو د پوهنتوني زده کړو او په ناحکومتي موسسو کې د کار د بندیز وروستۍ پرېکړه په پراخه پیمانه غندل شوې او د بریتانیا، امریکا، کاناډا، استرالیا، ناروې، پاکستان او ایران په شان ګڼو هیوادونو او همداراز د اروپايي اتحادیې، اسلامي همکارۍ سازمان او ملګروملتو په څیر نړیوالو موسسو پر دې اقدام د نیوکو ترڅنګ له طالبانو غوښتنه کړې چې خپله پرېکړه بېرته واخلي او افغان ښځې او نجونې کار او زده کړو ته پرېږدي.
خو د افغانانو او نړیوالو له بیا بیا غوښتنې سره سره طالبانو په خپله پرېکړه کې هیڅ راز بدلون نه دی راوړی.
د اسلامي همکارۍ سازمان تر دې مخکې هم افغانستان ته د دیني عالمانو یو پلاوی لېږلی و چې د ښځو د کار او تعلیم په اړه له طالب مشرانو سره وږغېږي.
د مفتي غزيز الرحمن ښځې يې نه مني.