تاند:( چار شنبه، د قوس درويشتمه) د طالبانو د ریاست الوزراء سیاسي مرستیال مولوي عبدالکبیر د تېرې ولسي جرګې له یو شمېر وکیلانو سره ليدلي او د هېواد د روان سیاسي، اقتصادي او ټولنیز وضعیت په اړه يې مشوړې ورڅخه اخيستي دي.
د مولوي کبير د مطبوعاتي دفتر د خبرپاڼې له مخې دغو پخوانيو وکيلانو ويلي:« دوی افغانستان خپل کور ګڼي، اسلامي نظام خپل مشروع نظام بولي او هر ډول مرستې ته یې چمتو دي.»
د سرچينې د معلوماتو له مخې، مولوي کبير ويلي، چې د دوی اداره د ټولو افغان شخصیتونو او کدرونو احترام کوي او هېواد ته په راستنېدلو یې خوښېږي.
هغه زياته کړې، چې هېواد ته د افغان شخصیتونو او کدرونو راتګ ورځ تر بلې ډېرېږي او دوی هم د کدرونو ښې مشورې اوري او له تجربو یې ګټه اخلي.
طالب چارواکو دا څرګندونې په داسې حال کې کړي، چې ورځ تر بلې دوی د افغانستان له اداري نظام څخه د کادرونو په ویستو، پر ځای ېې د خپلو ملایانو په ګمارلو او د سختو قيوداتو او مزاحمتونو له وضع کولو سره هېواد پرېښودو ته د افغان کادرونو او روښانفکرانو په مجبورولو تورنیږي.
طالبان بيا په دې اړه نیوکې نه تاییدوي.