تاند(شنبه، د عقرب ۷) د پاکستان د بهرنیو چارو وزارت وايي چې د دغه هیواد یو تبعه له کابو دوو لسیزو وروسته د ګوانتنامو له بنده خوشي شوی دی.
دا پاکستانی، چې سیف الله پراچه نومېږي، د عمر له پلوه د ګوانتنامو بند تر ټولو زوړ بندي و.
پراچه ۷۴ کلن دی او د بند د شل کلنې دورې ۱۶ کاله یې په ګوانتنامو کې تېر کړي دي.
د پاکستان د بهرنیو چارو وزارت په خبرپاڼه کې، چې نن (شنبه) خپره شوې، راغلي چې سیف الله پراچه نن له خوشي کېدو وروسته پاکستان ته رسیدلی دی.
د پاکستان د باندنیو چارو وزیر بلاول بوټو هم پر خپله ټویټرپاڼه کښلي چې «خوشاله یوو چې یو پاکستانی تبعه چې له هیواده دباندې بندي وو، بالاخره خپلې کورنۍ ته ستون شو.»
د امریکا د دفاع وزارت د ۲۰۰۸ کال په اسنادو کې پراچه یو خطرناک بندي بلل شوی دی.
خو د بشري حقونو ملاتړې ډلې وايی چې پراچه یو سوداګر و او کله چې په ۲۰۰۳ کال د یوې غونډې لپاره د تایلنډ د پلازمېنې بنکاک هوايي ډګر ته ورسید، له القاعده شبکې سره د تار لرلو په شک ونیول شو.
دی لومړی افغانستان او بیا ګوانتنامو ته ولېږدول شو.
پاکستاني رسنیو د پراچه له نیولو کېدو کابو یوه میاشت وروسته وویل چې نوموړی امریکایانو نیولی او هغه د زړه او قند ناروغۍ لري.
ښاغلی پراچه شتمن و، په امریکا کې یې ژوند کاوه او په نیویارک ښار کې یې کور درلود.