تاند- له نن څخه 18 کاله پخوا د ۲۰۰۶ د نوومبر په لومړۍ نېټه امریکايي ناول لیکوال ویلیم سټیران د ۸۱ کلونو په عمر د ماساچوسیټ ایالت په مارتا واین یارډ کې د تل لپاره سترګې پټې کړې.
سټیران د ډېرو په دې خاطر خوښ دی چې په خپلو اثارو کې یې تراژیک موضوعات غوره کړي او د پوخ او کلاسیک نثر خاوند دی.
سټیران مخکې تر دې چې په ۱۹۴۷ کې د شمالي کارولینا له ډوک پوهنتون څخه فارغ شي د امریکا په سمندري ځواک کې د عسکرۍ خدمت وکړ. په نولس سوه پنځوسمه لسیزه کې د هغو امریکایانو په ډله کې شامل و چې په پاریس کې یې کار کاوه. په ۱۹۵۳ کې د پاریس ریفیو (The Paris Review) سلاکار اډیټر شو.
د سټیران لومړنی ناول (Lie Down in Darkness)، چې په ۱۹۶۱ کې یې کښلی، په ویرجینیا کې د منځوۍ طبیقې د یوې بې مینې نجلۍ کیسه کوي چې تر ځانوژنې مخکې د عقلي – عصبي ناروغۍ د درملنې په هڅه کې ناکامېږي.
له دې وروسته یې بل ناول، چې (The Long March) نومېږي، اوپه ۱۹۵۶ م کال چاپ شوی، ولیکه. دا ناول یو جبري او بې رحمانه لاریون انځوروي.
سټیران که څه هم په ویرجینیا کې زېږېدلی خو د امریکا په جنوب کې لوی شوی او د جنوب کلتور او تاریخ ته لېوال و.
د ده بل ناول (The Confessions of Nat Turner)، چې په ۱۹۶۷ کې چاپ شوی، د ویرجینیا د یو شمېر تاریخي پېښو انځور دی.
د ده (Turner’s testimony) یا د ټونر اعترافونه ناول د هغه کس کیسه کوي چې خوښۍ د طبقاتي توپیر په خاطر ردوي. ده د دغه اثر په خاطر د پولیټزر معتبره ادبي جایزه وګټله.
سټیران د پولیټزر جایزې د ترلاسه کولو په مهال وویل:
«زما لپاره په دنیا کې تر ټولو سخت کار لیکل دي؛ خو د کار له بشپړولو وروسته، زما لپاره تر ټولو خوندور شی دی.»
په ۱۹۷۹ کې یې (Sophie’s Choice ) د سوفي انتخاب ناول ولیکه چې د جنوب د یوه ځوان لیکوال او د نازیانو له اشویڅ کمپه د یوې ژوندۍ ژغورل شوې رومن کاتولیک پولنډۍ ښځې ترمنځ د ملګرتوب کیسه کوي.
دا ناول ډیر لانجمن شو خو یو ډېر پلورل کېدونکی ناول و چې په ۱۹۸۲ کې ورڅخه فلم جوړ شو.
له دې وروسته ده د (the Clap Shack) په نوم ډرامه او په ۱۹۸۲ کې د (This Quiet Dust) تکلونو ټولګه چاپ کړه.
ده په ۱۹۹۰ کې (Darkness Visible) غیر داستاني اثر خپور کړ چې په هغه کې یې د ژورخپګان او په الکولو د روږدیتوب په اړه ځینو پوښتنو ته ځوابونه ویلي دي. دغه اثر د ده له شهرت سره لا ډیره مرسته وکړه.