تاند:( یکشنبه ،د ميزان درېيمه) د افغانستان د بې واکه شوي ولسمشر محمد اشرف غني لومړي مرستيال امرالله صالح په کابل کې د طالبانو د حاکمې ادارې او تر ټولو ډېر ملاتړي هېواد پاکستان تر منځ ناندريو ته ېې«د ترهګرو د ملاتړي او ترهګرې ډلې»د ناندرۍ نوم ورکړی.
د صالح په وینا، داسې ښکاري چې پاکستان په افغانستان کې د طالبانو له لوري له حده زیاتو ترهګرو ته په پناه ورکولو خوشاله نه دی.
د صالح په باور، پاکستان د افغانستان له اوسني وضعيت يا د طالبانو له پروژې د توقع مطابق ګټه نه ده تر لاسه کړې.
د نوموړي په خبره، ښایي د طالبانو ځينو ډلو ډېره وده کړې او له پاکستان وراخوا نورې پراخې اړيکې هم رامنځته کړې وي.
له دې سره صالح زياتوي،چې پاکستان د نړيوالو په تېر ويستلو او ورڅخه په مرستو تر لاسه کولو کې اوږده سابقه لري او ښايي وروستۍ هڅې ېې د ترهګرو د ملاتړو هېوادونو له خړ لیست څخه د خپل نوم د ويستلو او مالي مرستو د ترلاسه کولو لپاره کومه ډرامه وي.
د پاکستان صدراعظم شهباز شريف اوړمه ورځ د ملګرو ملتونو سازمان په عمومي اسامبلې کې تور پورې کړ،چې طالبانو په افغانستان کې ګڼو ترهګرو ډلو ته پناه ورکړې ده.
د شهباز شريف دغو څرګندونو د طالبانو د ادارې په ګډون د افغانانو غوسه پارولې ده.
د افغانستان پخواني ولسمشر حامد کرزي په دې اړه په يوه اعلاميه کې ويلي:« د کلونو کلونو پېښو دا ثابته کړې چې د مسئلې حقیقت کاملاً برعکس دی، یعنې افغانستان د تروریزم قرباني دی او د تروریستي ډلو ځالې له لسیزو راهيسې تر ننه پورې په پاکستان کې دي او د پاکستان د حکومت تر مستقیم حمایت لاندې له هغه ځایه د افغانستان په خلاف استعمالیږي.»
د حامد کرزي په ټویټر پاڼه کې راغلي:«پخوانی جمهور رئیس د پاکستان حکومت ته توصیه کوي چې د افغانستان پر خلاف له نا سمو تبلیغاتو لاس واخلي او برعکس د یو نېک گاونډي په توگه د دواړو هېوادونو ترمنځ د حسنه او متمدنو روابطو د ایجاد لپاره کوښښ وکړي.»
د طالبانو د بهرنيو چارو وزير مولوي امیرخان متقي د پاکستان او شهباز شريف له نوم اخیستو پرته په محتاطانه ډول د نوموړي څرګندونې رد کړې وې.