تاند:( یکشنبه ،د ميزان درېيمه) په ټولنیزو رسنیو کې ډېرو افغانانو د طالبانو د ادارې د لوړو زده کړو د وزیر مولوي عبدالباقي حقاني په تقدیریدو توند غبرګونونه ښودلي.
حقاني پرون په ارګ کې د طالبانو د رییس الوزرا د اقتصادي مرستیال ملا عبدالغني برادر اخند له لوري د حکومت حساب ورکولو په پروګرام کې د دولتي ادارو او رسنیو د تقدیر په مراسمو کې په يوه ستاینلیک وستايل شو.
د طالبانو د اعلاميې له مخې، په پروني پروګرام کې د هغه دولتي ادارو او رسنیو ستاینه شوې چې د حکومت حساب ورکولو په پروګرام کې یې ولس ته قناعت وړ راپور وړاندې کړی و.
یو شمېر خلکو عبدالباقي حقاني د طالبانو د ادارې هغه وزیر بللی، چې افغان کادرونو، تحصیلي بنسټونو او ټول ملت ته ېې له سپکاوي ډکې څرګندونې کړي.
د خلکو په باور، د حقاني ستایونکي څرګندوي،چې دوی له هغه سره هم نظره دي.
خلکو له مخکې نه د نوموړي د ګوښه کیدو غوښتنې کړې وې.
عبدالباقي حقاني څو ځله په خپلو څرګندونو کې د تېر شل کلن جمهوري نظام پر مهال تحصيل کړي خلک هېواد ته بې ګټې ګڼلي او ورته نورې ويناوې ېې کړې وې.