تاند:( سې شنبه، د جدي اته ویشتمه) ‏‏ راپورونه وايي، چې طالبانو په کابل کې د پاکستان خلاف د يوه تنظيم شوي لاريون ځینې مخکښان نیولي او بندیان کړي دي.

دغه لاريون نن د کابل د هوايي ډګر مخې ته د پاکستان د ملي امنيت سلاکار ډاکټر معيد يوسف د لغوه شوي سفر په مناسبت پلان شوی و، چې د سفر له لغوه کیدو سره تر سره نه شو.

د لاريون د تنظيمونکو ځينو سرچينو ويلي، چې ځينې مخکښان يې د طالبانو د استخباراتو له لوري نیول شوي دي.

په دې اړه ډېر جزییات نه دي ورکړل شوي، خو سرچينو د عظيم عظيمي په نوم د لاریون د یوه مخکښ تنظیمونکي نیول کیدل تایید کړي دي.

د دغو کسانو نیول کیدو ته په ټولنیزو رسنیو کې غبرګونونه هم ښودل شوي.

افغان لیکوال او سياسي فعال نجيب ننګیال د طالبانو دغه عمل ته په غبرګون کې ويلي:‏چې وطن اشغال نه دی، نو د پاکستان ضد لاریون تنظیموونکي ولې نیول کېږي؟ سپينه خبره ده. کابل کې پنجاب ناست دی او پنجابي کرنېلان هر هغه څوک نیسي چې پاکستان ضد ذهنیت ولري.

طالبانو د دغه نا ترسره شوي لاريون د مخکښانو د نیول کیدو په اړه څه نه دي ويلي.