تاند:( دوشنبه، د ميزان پینځمه) په کابل کې د ترکيې سفير جیهاد ارګین آی د افغانستان د سږني کانکور ازموینې اول نومرې سلګۍ باران ته د تحصيلي بورس د ورکولو ژمنه کړې ده.
د طالبانو د اسلامي امارت د لوړو زده کړو وزارت په يوه اعلاميه کې ويلي، چې دا ژمنه ترکي سفير د دغه وزارت له سرپرست شېخ عبدالباقي حقاني سره د لیدنې پر مهال کړې ده.
سرچينې ويلي، چې په ليدنه کې په ترکيه کې د افغان محصلینو د ستونزو او افغان پوهنتونونو د لابراتوارونو د تجهيزاتو په اړه خبرې شوي.
دا ليدنه په داسې مهال شوې، چې له بهرنيو زده کړو په رخصتۍ راغلي سلګونه افغان محصلین د پاسپورټونو د مودې له پوره کيدو سره يې په هېواد کې ايسار پاتې دي.
دوی له طالبانو غواړي چې زر د پاسپورټونو وېش پیل او له هېواده د وتو زمینه ورته برابره کړي.
طالبان په پرله پسې ډول د پاسپورټونو د زر وېش ژمنې کوي، خو د واکمنۍ د نيږدې يوې نيمې مياشتې له پوره کيدو سره يې په دې اړه کوم ګام نه دی اخیستی.