تاند(شنبه، د سنبلې ۲۰) طالبانو نن دا ادعا رد کړه چې ګنې د افغانستان د پخواني مرستیال ولسمشر امرالله صالح ورور روح الله (عزیزي) صالح دوی وژلی دی.
د رویټرز خبري اژانس د راپور له مخې، طالبانو د خپلې ویبپاڼې الامارې په اردو برخه کې ویلي چې روح الله صالح په پنجشېر کې د جګړې په ترڅ کې وژل شوی نه دا چې دوی نیولی او بیا وژلی وي.
تر دې مخکې پرون د امرالله صالح زوی عبادالله صالح رویټرز خبري اژانس ته ویلي و چې طالبانو د ده کاکا روح الله صالح (عزیزي) د پنجشنبې په ورځ وژلی دی.
طالبانو د تېرې اوونۍ د پنجشنبې په ورځ اعلان وکړ چې ټول پنجشېر ولایت یې نیولی دی.
خو د دوی وسله وال مخالفان وايي چې د پنجشېر په ځینو سیمو کې د طالبانو په وړاندې جګړې ته دوام ورکوي.