تاند(شنبه، د سنبلې ۲۰) د روسیې د امنیت شورا مرستیال وايي، امریکا په افغانستان کې داسې پوځي سیستم جوړ کړی و چې د امریکا له ملاتړه پرته یې دوام نه شوای کولی.
د تاس خبري اژانس د راپور له مخې، دیمیتري میدویدیف نن /شنبه/ په یوه مرکه کې وویل، د امریکا حکومت د افغانستان له پخواني حکومت سره د ملاتړ په دوام کې پاتې راغی.
ده زیاته کړه «پینتاګون د افغانستان ملي امنیتي ځواکونه وروزل او په وسلو یې سمبال کړل. خو د وروستیو میاشتو انکشافاتو وښوده چې دې ځواک د امریکا له ملاتړه پرته دوام نه شوای کولی.»
د روسیې د امنیت شورا مرستیال همداراز وویل، د امریکايي پوځیانو له وتلو وروسته د افغانستان وسله والو ځواکونو وښوده چې د امریکا له پیسو او ملاتړه پرته د جګړې اراده نه لري. دوی په اسانه ولسوالۍ او ولایتونه او حتي د هیواد پلازمېنه بې جګړې پرېښوده. په افغانستان کې د امریکا له لوري ټول جوړ شوي پوځي تاسیسات له خاورو سره خاورې شول.
د ده په وینا د افغانستان په جګړه کې ۲۵۰۰ امریکايي پوځیان او ۴۰ زره ملکي افغانان ووژل شول او تر ۷۵ زره ډېر نور ژوبل شول.