تاند(پنجشنبه، د سنبلې ۱۸) د افغانستان د کرکټ ټیم د شل اوره سیالیو کیپتان او نامتو لوبغاړي راشد خان نن/ پنجشنبه له کیپتانۍ د اعتراض په دود استعفا وکړه.
راشد خان ویلي، په دې خاطر یې استعفا کړې چې د کرکټ د نړیوال ۲۰ اوره جام لپاره د افغانستان لوبډله د ده له مشورې پرته اعلان شوې ده.
د افغانستان کرکټ بورډ د پنجشنبې په ورځ د راتلونکي نړیوال شل اوره جام لپاره لوبډله اعلان کړه خو له اعلانه څو دقیقې وروسته راشدخان وویل، د غوراوي کمېټې او کرکټ بورډ له ده سره د ټیم د غوراوي په اړه خبرې نه دي کړي.
ده پر خپله ټویټرپاڼه کښلي«د کیپتان او خپل ملت ته د یوه مسوول کس په توګه، زه د دې حق لرم چې د لوبډلې په غوره کولو کې برخه ولرم. د غوراوي کمېټې او د افغانستان کرکټ بورډ د هغه ټیم لپاره چې کرکټ بورډ په رسنیو کې اعلان کړ، له ما څخه مشوره نه ده اخیستې.»
ده همداراز ویلي چې د افغانستان د شل اوره سیالیو له کیپتانۍ سر له همدې شېبې لاس اخلي خو په دې تل ویاړي چې د افغانستان لپاره لوبې کوي.
د افغانستان کرکټ بورډ د شل اوره نړیوال جام لپاره، چې په عمان او متحده عربي اماراتو کې کېږي، محمد شهزاد شامل کړی او افسر ځاځی او فرید ملک یې د زخیره لوبغاړو په توګه په لوبډله کې ځای کړي دي.
شهزاد کلونه کېږي چې له لوبډلې ایستل شوی دی.
د راشد خان استعفا په یوه ورځ کې د افغانستان کرکټ ته دوهم کوزار دی.
تر دې وړاندې یوه طالب چارواکي احمدالله وثیق بې ضرورته اعلان وکړ چې ښځو ته د سپورت اجازه نه ورکوي. دې مسله سبب شوه چې د کرکټ نړیواله شورا او د استرایل کرکټ بورډ له افغانستان سره ټیستلوبه لغوه کړي.