تاند(شنبه، د سنبلې ۱۳) په پنجشېر دره کې طالبان د پرمختګ او مقابل لوری یې طالبانو ته د درنو مرګ ژوبلو د اړولو ادعا کوي.
طالبان وايي چې د پنجشېر ولایت پریان، خنج، شوتل(شُتل)، آبشار او عنابه ولسوالۍ یې نیولي او جګړه یې د پنجشېر مرکز بازارک ته نژدې روانه ده.
ځینې طالبان دا هم وايي چې اوس د بازارک د نیولو پر سر سخته جګړه روانه ده. دوی ویدیوګانې خپرې کړي چې په هغو کې طالبان د ولایت د مقام لور ته د پرمختګ په حال کې ښيي. د دغو ویدیوګانو کره والی خپلواکې سرچینې نه شي تاییدولی.
خو مقابل لوری یې سره له دې چې د طالبانو پرمختګونه تاییدوي، وايي چې په پنجشېر کې یې څو ځایه طالبان محاصره کړي دي.
د ملي مقاومت جبهې په نوم د طالبانو وسله والو مخالفانو یوه ویندوی فهیم دشني رسنیو ته په استولي پیغام کې ویلي چې د (ریوت) دښتې په سیمه کې یې هغه مهال طالبان محاصره کړل چې په غره کې د دوی له لوري چاودول شویو موادو د طالبانو لار بنده کړه.
ده همداراز ویلي په دې سیمه کې د دواړو خواوو ترمنځ سخته جګړه روانه ده.
دشتي زیاته کړې چې د خاواک کوتل هم د دوی له لوري بند کړای شوی او زرګونه طالبان په پریان ولسوالي کې محاصره شوي دي.