تاند: شنبه، اسد٢٣) – د افغانستان د ملي دفاع وزارت وايي، په تېرو ۲۴ ساعتونو کې ۱۷۲ ترهګر طالبان وژل شوي او ۱۰۷ نور ټپيان دي.
د دغه وزارت له لوري په خپره شوې خبرپاڼه کې راغلي، دغه طالبان په ننګرهار، لوګر، مېدان وردګ، کندهار او بلخ ولایتونو کې وژل شوي او ټپيان دي.
خبرپاڼه کې راغلي، د دغو نښتو پر مهال یوه زیاته اندازه وسلې او مهمات هم له منځه وړل شوي دي.
حکومت داسې مهال وسله والو طالبانو ته د يادې مرګژوبلې د اوښتو خبره کوي چې طالبانو د دوو اونيو په ترڅ کې د نږدې ١٧ ولايتونو مرکزونه ته سقوط ورکړى او اوس دغه ډله د پلازمېنې په ٥٠ کيلومترۍ کې قرار لري.
د طالبانو په لاس د لوګر له سقوط وروسته اوس د افغانستان د کورنیو چارو وزارت د کابل ولایت په چهاراسیاب کې د عملیاتو په هدف د اضافي سرتېرو د ځاى پر ځاى کولو په تړاو هڅې پیل کړې دي.
بل پلو د طالبانو له لوري د فراه ولایت په سقوط سره په لومړۍ ورځ د دې ولایت د ملي راډیو تلویزیون ټول وسايل او تجهیزات لوټل شوي دي.
د فراه د ملي راډیو تلویزیون آمر محمد هاشم وویل، د ټولو وسايلو په لوټلو د دې رسنۍ نشرات له کاره لوېدلي دي.
دغه راز يوه امنيتي سرچينه وايي، د جمعې په ورځ د فراه په کهدانک سيمه کې نامعلومو وسله والو دوه دولتي کارکوونکي وژلي دي.
په وژل شويو کسانو کې د فراه د استېناف څارنوالۍ کارمند سيداحمد او طالبانو ته تسلیم شوى د کمانډو ځواکونو سرتېرى شيراقا شامل دي.
کمانډو سرتېرى تېر ماښام د فراه په څلورمه ناحيه کې وژل شوى دى.