تاند(پنجشنبه، د اسد۲۱) د افغانستان د ملي مصالحې ريیس عبدالله عبدالله پرون / چهارشنبه په دوحه کې د پاکستان له ځانګړي استازي ښاغلي محمد صادق خان او د افغانستان د سولې لپاره د ملګروملتو له ځانګړې استازي سره ولیدل.
د پاکستان استازي محمدصدیق خان له عبدالله عبدالله سره په کتنه کې په افغانستان کې د جګړې شدت ته په کتو وویل، چې جګړه د حل لاره نه ده او ژمن دی چې د افغانستان له سولې سره مرسته وکړي. هغه د مذاکراتو په بیا پیل او دوام ټينګار وکړ.
ښاغلي عبدالله د پاکستان استازي ته وویل چې په افغانستان کې جګړه سیمه ناامنه کوي او اړتیا ده چې د سیمې هېوادونه هم په یوه خوله په افغانستان کې د جګړې د پای ته رسېدو لپاره دریځ غوره کړي.
ده همدارنگه ټينګار وکړ چې په افغانستان کې ټول سیاسي او جهادي مشران او خلک د جګړې د مخنیوي او د افغانستان د ژغورنې لپاره یوه خوله دي او د خپلو امنیتي ځواکونو ملاتړ کوي.
د ملي مصالحې د عالي شورا رئيس پرون د افغانستان د سولې لپاره د ملګرو ملتونو له ځانګړي استازي سره په دوحه کې په خپل استوګنځي کې ولیدل.
په دې ناسته کې د افغانستان سولې لپاره د ملګرو ملتونو ځانګړي استازي په افغانستان کې د جګړې په فوري بندېدو ټینګار وکړ او ویې ویل چې باید د سولې د مذاکراتو پر وړاندې خنډونه لرې شي.
هغه وویل، چې دوی په افغانستان کې له پراخېدونکې نا امنۍ او د جګړې له زور اخیستو اندېښنه لري او غوښتنه کوي چې د سیاسي توافق د رامنځته کېدو لپاره دې جګړه بنده او مذاکرات سرعت پيدا کړي.
د ملي مصالحې عالي شورا رئیس د ملګرو ملتونو له ځانګړي استازي نه د مننې ترڅنګ وویل، اوس د دې وخت را رسېدلی چې نړۍ په یوه خوله په افغانستان کې د سولې تامین او جګړې د پای ته رسېدو لپاره واحد دریځ غوره کړي.
هغه وویل، چې طالبانو تل له خبرو اترو مخ ګرځولی او په افغانستان کې یې د جګړو په دوام سره یې د ملکي تلفاتو شمېر لوړ او زرګونه کورنۍ یې بېځایه کړي دي.