تاند (سې شنبه/ د زمري ۱۲مه) — د پلازمېنې کابل په شمول د افغانستان د بېلابېلو ښارونو په لسګونو زرو اوسېدونکيو او د ټولنیزو رسنیو کارونکیو نن د ماښام له ۹ بجو څخه د خپلو د بامونو له سرونو، لارو او کوڅو څخه د تکبیر او الله اکبر چیغې ووهلې.
د کابل، جلال اباد، اسد اباد، خوست، مزار شریف،… په شمول د افغانستان د ګڼو ښارونو اوسېدونکیو د افغان ملي دفاعي او امنیتي ځواکونو په ملاتړ د الله اکبر او د وسله والو مخالفینو پر ضد شعارونه ورکړل.
په ټولنیزو رسنیو د طالبانو د ډلې یو شمېر مینه والو د حکومت او مدني حرکتونو له خوا د الله اکبر کاروان ته بلنه یوه لوبه بللې وه او لیکلي یې وو چې دا لوبه به هم تېره شي.
ویل کیږي چې د پخوانیو افغان تنظیمونو غړو او بیا ورپسې وسله والو طالبانو د تېرو څلورو لسیزو په ترڅ کې دیني شعایر یوازې د خپلو سیاسي هدفونو لپاره کارول او تر ډېره یې د انسانانو د وژلو او د افغانستان د شتمنیو د ویجاړولو پر وخت د الله اکبر له نامه څخه استفاده کوله.
نن په نورو سربېره، د پښتون ژغورنې غورځنګ مشرانو منظور احمد پښتین او محسن داوړ او په افغانستان کې د کاناډا پخواني سفیر کریس الیګساندر هم د الله اکبر مقدس الفاظ په خپلو رسنیو باندې خپاره کړي دي.