تاند — د احصائیې او معلوماتو ملي ادارې مسؤلین وایي چې د روان کال په لومړیو دوو میاشتو کې ۱،۵ میلیون کمپیوټري تذکرې وېشل شوې دي.
دغه څرګندونې ددې ادارې رئیس احمد جاوید رسولي له ولسمشر غني سره په لیدنه کې کړي.
د ارګ په یوه خبرپاڼه کې راغلي چې ښاغلي رسولي ولسمشر غني ته د یادې ادارې د کړنو، اجرأتو او ننګونو راپور وړاندې کړ او ویې ویل چې یوازې د روان کال په حمل او ثور میاشتو کې ۱،۵ میلیون کمپیوټري تذکرې وېشل شوي.
د نوموړي په خبره چې په مجموعي ډول د ۴،۵ میلیون نورو پراوونه بشپړ شوي هم دي.
د خبرپاڼې له مخې ولسمشر غني په دې ناسته کې وویل چې د احصائیې او معلوماتو ملي ادارې د ستونزو د حل په هکله پرمختګونه شوي، خو لا زیاتو اقداماتو ته اړتیا ده.
د ولسمشر اشرف غني په خبره، باید په افغانستان کې معلومات دیجیټلي شي، همداراز دې د معلوماتو او سروې څېړنه د بین المللي منل شویو معیارونو مطابق ترسره او ایجاد شوي سیستمونه دې په معیاري ډول پیاوړي شي.