تاند ( سې شنبه، د ثور ۲۱ ) د کندهار د کرنې، اوبولګولو او مالدارۍ ریاست مسوولان وایي چې سږ کال په دغه ولایت کې د ځمکني توتانو په حاصلاتو کې د تېر په پرتله زیاتوالی راغلی دی.
دوی وایي، سږ کال په دغه ولایت کې بزګرانو په لسګونه جریبه ځمکه ځمکني توتان کرلي چې ښه حاصلات یې ورکړې دي.
افغانستان د ځمکنيو توتانو کرکيلي لپاره مناسبه هوا او اوبه لري چې سږ کال د هېواد په ځينو برخو په ځانګړې توګه کندهار او ننګرهار کې یې کرکیله پراخه شوې ده.
ځمکني توتان په لويه کچه د ويټامين سي تر څنګ په خپل ترکيب کې نور ويټامينونه هم لري چې د انسان روغتيا لپاره ګټور بلل کېږي.
بزګران وايي، چې سږکال د ځمکني توتانو حاصلات د تېرو کالونو پرتله څو برابره زیات شوي دي، خو له مسوولینو یې غوښتنه دا ده چې حکومت دې د بازار موندلو ترڅنک د ځمکني توت د ساتلو لپاره سړې خونې ورته جوړه کړي.
دوی همدا راز له حکومت غواړې چې د ځمکني توتانو د کرکيلې، حاصلاتو ټولولو، ساتلو، بسته بندۍ او پلور په موخه ورته زمينې برابرې کړي.
د معلوماتو له مخې، ځمکني توتان له کرلو درې میاشتي وروسته پر حاصل راځي او هرو دوو ورځو کې ترې حاصل ټولیږي.
باید وویل شي چې اوس په بازار کې د يو کیلو ځمکنيو توتانو بېه له ۲۰۰ نیولې تر ۲۵۰ افغانۍ پورې ده.
د کندهار ترڅنګ ننګرهار کې هم سږکال د ځمکني توتانو حاصل ۱۵۰ ټنه اټکل شوی دی.
مسوولان وایي د دې ولایت په دره نور، سره رود، خوږياڼو، ګوشتې، کوز کونړ او پچیر ګام ولسواليو کې د کرنې رياست او بزګرانو له لوري ۷۳ جريبه ځمکه کې ځمکني توتان کرل شوي دي.