تاند(جمعه، د ثور۱۷) د امریکا لوی درستیز وايي، له افغانستانه د خپلو ځواکونو له ایستلو وروسته ښايي په یوه بل هیواد کې د افغان امنیتي او دفاعي ځواکونو روزنې ته دوام ورکړي.
د متحدو ایالتونو لوی درستیز جنرال مارک میلي په پنتاګون کې یوې خبري غونډې ته وویل چې دا د څو نورو انتخابونو په منځ کې یو انتخاب دی.
ده همداراز وویل، امریکا تراوسه پورې د افغان هوايي ځواک د ملاتړ د دوام پلان جوړ کړی نه دی.
افغان هوايي ځواک د ترمیم او روزنې په برخو کې لا هم تر ډېره په امریکا متکي دی.
د متحدو ایالتونو د پوځ لوی درستیز وویل، امریکا به ځینې مرستې له بهره کوي، خو ځینې چارې باید افغانانو ته وسپارل شي چې دوی یې په خپله وکړي.
په همدې حال کې د امریکا دفاع وزیر لویډ اسټن تایید کړه چې په افغانستان کې دننه د امریکایانو له ملاتړه پرته به افغانان له ځینو ننګونو سره مخامخ شي.
اسوشیتید پریس خبري اژانس وايي، دا له کله چې ولسمشر بایډن د جنورۍ په نیمايي کې د ولسمشر په توګه دنده پیل کړې، د متحدو ایالتونو د دفاع وزیر او لوی درستیز لومړنۍ ګډه خبري غونډه وه.
ولسمشر جو بایډن د تېرې میاشتې په نیمايي کې اعلان وکړ چې ټول امریکايي پوځیان به د سپټمبر تر ۱۱ پورې له افغانستانه وباسي.
د بایډن له اعلانه وروسته د ناټو نورو غړیو هم اعلان وکړ چې خپل پوځیان تر دې هم مخکې باسي.