تاند ( یکشنبه، د کب ۲۴) کورنیو چارو وزارت په کابل ښار کې د انسان تښتوونکو د څلور کسیزې ډلې د نیول کېدو خبر ورکوي.
له دغه وزارت څخه په خپره شوې خبرپاڼه کې راغلي چې د کابل پولیسو د کشفي معلوماتو په اساس د کابل ښار د نهمې امنیتي حوزې په اړوند ګمرک سیمه کې د انسان تښتوونکو څلور کسیزه ډله نیولې ده.
خبرپاڼه وایي، یادې ډلې د کابل ولایت په دهسبز ولسوالي کې یو کس تښتولی و او غوښتل یې بلې سیمې ته یې ولېږدوي چې د لنډې نښتې په ترڅ کې د پولیسو له لوري نیول شوې ده.
د خبرپاڼې د معلوماتو له مخې، تښتول شوی کس د انسان تښوونکو له منګولو ژغورل شوی او همداراز یوه وسله یوه پایه مخابره او یو عراده موټر هم د پولیسو لاسته ورغلي دي.
د کورنیو چارو وزارت خبرپاڼه دغه راز وایي، د کابل ګډ امنیتي ټیم د کابل ولایت د سروبي ولسوالي په اوزبین سیمه کې هم د یو لړ عملیاتو په ترڅ کې دوه کسه د انسان تښتوونکو له منګولو ژغورلي دي.
دا په داسې حال کې ده چې کابو درې میاشتې وړاندې د بلخ ولایت مزارشریف ښار څخه د عبدالرووف په نوم یو ماشوم د انسان تښتوونکو له لوري تښتول شوی؛ خو افغان حکومت یې لا هم په پیدا کولو کې نه دی بریالی شوی.