تاند (یکشنبه د حوت ۲۴) د راپورونو له مخې نن سهار شاوخوا ۸ بجې په جلال اباد ښار کې ناپېژانده وسله والو پر یوه پولیس ډزې وکړې او هغه یې وواژه.
د امنیتي سرچینو د معلوماتو له مخې، بریدګر له سیمې په تېښته بریالي شوي خو د نیولو لپاره یې هڅې روانې دي.
د عیني شاهدانو په وینا، دوه تنه وسله وال چې مخونه یې پټ و د برېښنا ریاست یو پولیس چې په خپله دنده بوخت و د تومانچې په ډزو وواژه.
د دوی په وینا بریدکوونکو وروسته د وژل شوي پولیس وسله واخیسته او د هوايي ډزو په کولو سره له سیمې په تېښته بریالي شول.
باید وویل شي چې تېره ورځ ناوخته د جلال اباد ښار په کمپونو سیمه کې هم یو کس چې هویت یې معلوم نه دی، په ډزو وژل شوی او عاملین یې تښتېدلي دي.
بله خوا نن سهار د غزني ښار د پنځمې امنیتي حوزې اړوند سیمه کې ناپېژانده وسله والو ددغه ولایت د استیناف محکمې یو کارکوونکی وژلی دی.
د غزني ولایت مقام رسنیو ته ویلي چې دغه کس له خپله کوره د دفتر پر لور روان و چې ناپېژانده وسله والو برید ورباندې وکړ.
تر اوسه ددې پېښو مسؤلیت کوم چا یا کومې ډلې نه دی منلی.
دا بریدونه په داسې مهال کېږي چې تازه د ملګرو ملتونو امنیت شورا په افغانستان کې وروستي هدفي بریدونه په کلکو ټکو غندلي او ددې ډول بریدونو د ژر تر ژره درېدو غوښتنه یې کړې ده.
د م. م امنیت شورا په افغانستان کې د هدفي وژنو د سملاسي بندېدو غوښتنه وکړه