تاند ( شنبه، د حوت ۲۳) د ملي دفاع وزارت وایي چې افغان ځواکونو د هوايي ځواکونو په ملاتړ د پوځي عملیاتو په دوام نن د کندهار ولایت ارغنداب، ژېړۍ ولسوالیو کې ۲۸ طالبان وژلي دي.
دفاع وزارت وایي د دې عملیاتو پرمهال په یادو سیمو کې ۷ تنه نور ټپيان شوي هم دي.
سرچینه زیاتوي چې دغه راز په دې عملیاتو کې افغان ځواکونو د وسله والو طالبانو یو موټر، ۳ موټرسایکلونه، ۱۳ بورۍ چاودیدونکي توکي، ۵۰ موضع، او دغه راز یوه اندازه درنې او سپکې وسلې هم له منځه وړې دي.
بل لورته د ننګرهار په شیرزادو ولسوالۍ کې د تېرو ۲۴ ساعتونو پر مهال د توپچي بریدونو پرمهال ۷ وسله وال طالبان وژل شوي او ۵ نور ټپیان شوي دي.
د دې ولایت امنیتي چارواکي وایي دغه راز امنیتي ځواکونو په یاده سیمه کې یو شمېر کلي هم د طالبانو له شتون نه پاکې کړي دي.
بل لورته وسله والو طالبانو تر اوسه د یادو پېښو په اړه رسنیو ته څه نه دي ویلي.