تاند ( پنجشنبه، د دلوې ۲۳ ) د هلمند ولایت ځايي چارواکي وايي، په دې ولایت کې شاوخوا شپږ زره کسانو ته الکترونیکي تذکرې ویشل شوي دي.
د هلمند د الکترونیکي تذکرو د وېش ولایتي مسؤل محمد نبي شېرزاد وايي چې د دغو تذکرو وېش په چټکۍ روان دی.
د نوموړي په وینا، اوسمهال هره ورځ په هر زون کې په اوسط ډول ۲۰۰ تر ۳۰۰ پورې کسان د دغو تذکرو د اخیستلو لپاره نومونه راجستر کوي.
هغه له مرکزي حکومته غواړي څو دې ولایت کې د تذکرو د ویش مرکزونه ډېر کړي ځکه په خبره یې د خلکو نفوس او تقاضا ډېره ده او مرکزونه یې کم.
د معلوماتو له مخې په هلمند کې شاوخوا درې میاشتې وړاندې د برقي پېژندپاڼو د ویش لومړنی مرکز پرانیستل شو او څو ورځې وړاندې د ډېرې تقاضا له کبله په مرکز لښکرګاه کې دوهم مرکز هم پرانیستل شو.
د افغانستان د معلوماتو او احصائیې ریاست مسؤلین وایي په ټول هېواد کې هره ورځ تر ۴۰ زره کسان د یادو تذکرو اخیستلو لپاره مراجعه کوي. د دغه ریاست مسؤلینو زیاتوي چې په ۱۴۰۰ لمریز کال کې به د افغانستان ۵ ملیونه وګړو ته الکترونیکي تذکرې ووېشل شي.