تاند ( سې شنبه، د دلوې ۲۲) د افغانستان ملي دفاع وزارت خبر ورکوي چې د تېرو ۲۴ ساعتونو په موده کې د هېواد درې ولایتونو کې د افغان هوایي او ځمکنیو ځواکونو د بریدونو په ترڅ کې ۶۹ وسلوال طالبان وژل شوي دي.
دغه وزارت د جلا جلا خبرپاڼو په خپرولو سره ویلي چې یاد وسلوال په ننګرهار، کندهار او فاریاب ولایتونو کې وژل شوي او دغه راز ۳۴ تنه نور یې ټپیان شوي دي.
د یاد وزارت د مالوماتو له مخې، کندهار کې ۳۰ ، ننګرهار کې ۱۱ او فاریاب کې ۲۸ طالبان وژل شوي او همدا راز په ننګرهار او فاریاب ولایتونو کې د دې ډلې ۳۴ جنګیالي ټپیان شوي دي.
په ورته مهال د بادغیس ځایي چارواکي وایي، طالبانو تیره شپه د مقر ولسوالي پر مرکز برید کړی چې په پایله کې یې څلور پولیس وژل شوي، دوه پولیس او یو د ملي اردو سرتېری ټپیان شوي دي.
د یو بل خبر له مخې، هرات کې ماین چاودنې د عامه ساتنې پنځه سرتېري وژلي دي.
په ورته مهال د کورنیو چارو وزارت وایي، پولیسو په فاریاب، بدخشان، بلخ ننګرهار او تخار ولایتونو کې د نشه‌یی توکو قاچاق په تړاو ۱۶ کسان نیولي چې له یادو کسانو یو شمېر نشه يي توکي او وسلې هم تر لاسه شوي دي.
له بلې خوا بیا د افغانستان ملي امنیت ریاست وایي، ځانګړو ځواکونو د داعش او حقاني ډلې د هدفي وژنو شپږ کسیزه ډله نیولې ده.
د یاد ریاست له لوري په خپره شوې خبر پاڼه کې ویل شوي، یادو کسانو د چاودېدونکو توکو لېږد، هدفي او زنځیري وژنو کې لاس درلود چې د ملي امنیت ځانګړو ځواکونو په عملیاتو کې ونیول شول.