تاند(یکشنبه، د دلوې ۱۹) په تیرو دوه میاشتو کې د ملي دسترخوان د پروګرام له لارې شاوخوا ۲.۵۴۸میلیونه کسانو ته د خوراکي او غیرخوراکي توکي مرستې رسیدلي دي.
د کلیو بیارغونې او پراختیا وزارت څخه خپره شوې خبرپاڼه کې راغلي، تر اوسه ۳۶۴ زره او ۱۳ کورنۍ د ملي دسترخوان له مرستو برخمنې شوي دي.
د ملي دسترخوان پروګرام له پیل راهیسې چې دوه میاشتې یې کیږي د ۱ میلیارد او ۴۵۶ میلیونه افغانیو په ارزښت ۳۶۴ زره او ۱۳ کورنیو ته چې نږدې ۲.۵۴۸ میلیونه کسان کیږي، د هیواد د ټولو ۳۴ ولایتونو د ۱۱۵ ولسوالیو په ۲۷۲۵ کلیو کې له مرستندویه توکیو برخمن شوي دي.
د ملي دسترخوان پروګرام مرستې د هیواد په ۳۴ ولایتونو کې د بې وزلیو او کورونا ناروغۍ ځپلو کورنیو سره په دوو پړاوونو کې ترسره کیږي او نږدې ۹۰ سلنه افغانان به ورڅخه برخمن شي.
د ملي دسترخوان په نوم، د مرستو ویشلو پروګرام طرحه که هم څه د ولسي جرګې لخوا رد شوه، خو د ولسمشر محمد اشرف غني په حکم د کلیو بیارغونې او پراختیا وزارت او د سیمه ایزو ارګانونو خپلواکې ادارې له لوري د ولسي تړون ملي پروګرام په چوکاټ کې یې مرستې ویشل په ټول هېواد کې جریان لري.