تاند(یکشنبه، د میزان ۲۰) پاکستان وایي د افغانستان اقتصادي وده او له دغه هېواد سره ښې اړیکې لرل د ټولې سیمې له ودې او پرمختګ سره مرسته کوي.
د پاکستان یوې سیاسي څېرې او ددغه هېواد د حکومت چارواکي شهریار اپرېدي ویلي دي پاکستان او افغانستان په خپلو کې د اقتصادي اړیکو د پراختیا لپاره خورا ډېر فرصتونه لري.
د هغه په وینا پاکستان، چین او افغانستان په ګډه کولی شي په سیمه کې ستر اقتصادي تحولات رامنځ ته کړي چې له دې سره جوخت به ترهګري او ناامني له سیمې ورکه شي.
د نوموړي په خبره پاکستان ته په کار ده چې له افغانستان سره د سولې په راوستلو کې همکاري وکړي، ځکه ددغه هېواد امنیت او سوله د پاکستان او سیمې د سولې په مانا ده.