تاند(یکشنبه، د سنبلې ۲۳) د افغانستان لپاره د ناروې ځانګړي استازي پیرالبرت الساس په دوحه کې د ملي مصالحې عالي شورا له مشر ډاکټر عبدالله عبدالله سره کتلي دي.
دواړو لورو د سولې په برخه کې پر وروستیو پرمختګونو بحثونه کړي دي.
د ناروې ځانګړي استازي د بین الافغاني خبرو پیل یو تاریخي فرصت بللی دی او هیله یې څرګنده کړې چې دغه مذاکرات د افغان جګړې د پای سبب شي.
پېرالبرت دغه راز ویلي چې ناروې د بین الافغاني مذاکراتو کوربه توب ته تیاره ده او که دواړه لوري وغواړي نو ددغه مذاکراتو یو پړاو به په ناروې کې ترسره شي.
عبدالله عبدالله هم د نړیوالو په تېره د ناروې له همکاریو مننه کړې ده او په خبره یې د سیمې او نړۍ د هېوادونو په ګډه همکارۍ به افغانان ورځ تر بلې سولې ته نږدې کېږي او افغانستان کې د سولې په راتګ سره به په سیمه کې د امنیت او پراختیا نوی باب پرانیستل شي.