تاند (جمعه، د اسد ۱۷) مشورتي لویه جرګه د څلور سوه طالب زندانیانو د برخلیک معلومولو په اړه د شاوخوا ۳۵۰۰ کسانو په ګډون په کابل کې پیل شوه.
په دې جرګه کې د ولسمشر غني، د ملي روغې جوړې عالي شورا د مشر ډاکټر عبدالله عبدالله تر څنګ د کابینې غړو، د ملي شورا غړو، جهادي مشرانو او د بهرنیو هېوادنو استازو او د هېواد له ۳۴ ولایتونو څخه زرګونو کسانو ګډون کړی دی.
مشورتي لویې جرګې ته د ملي روغې جوړې د عالي شورا د مشر عبدالله عبدالله وینا:
د اساسي قانون له مخې د پاتې ۴۰۰ طالب بندیانو خوشې کول د ولسمشر صلاحیت نه دی.
د مشورتي لویې جرګې جوړېدل یو مهم ګام دی.
سبا به د ملي روغې جوړې عالي شورا وروستۍ کاري برخه هم تکمیل شي، باوري یم چې یوې مثبتې پایلې ته به ورسېږو.
ځینې خلک فکر کوي چې دوی به جګړه وګټي، دا ډول فکرونه غلط دي.
موږ د مشورتي لویې جرګې د غړو د پرېکړې پلي کولو ته ژمن یو، د هیواد لپاره ستاسو پریکړه د ژوند او مرګ پریکړه ده.
هیله لرو ستاسو د سمې پریکړې په پایله کې به په هیواد کې دایمي سوله او ثبات رامنځته شي.
مشورتي لویې جرګې ته د ولسمشر اشرف غني وینا:
مشورتي لویه جرګه هغه ځای دی چې خلک پکې بغیر له کوم قید او شرط پرته د زړه خبرې تبادله کوي.
ستاسو د نن او سبا ورځې تصمیم ډېر مهم دی، زه تاسې ته کوم فرمایش نه لرم.
د ښوونکو د استخدام لپاره ۱۵ زره نوي بستونه اعلانېږي.
د پاتې ۴۰۰ طالب زندانیانو خوشې کول زما صلاحیت نه، بلکې ددغې جرګې په تصمیم پورې اړه لري.
وسله والو طالبانو ژمنه کړې چې د خپلو ټولو بندیانو تر خلاصېدو وروسته به په درې ورځو کې د افغانانو تر منځ خبرې اترې پیل کړي او له حکومت سره به اوربند وکړي.
موږ ریښتیني سولې ته اړتیا لرو، د ۵۰۰۰ طالب بندیانو پر ځای مو تر اوسه ۵۱۰۰ تنه بندیان خوشې کړي.
د مشورتي لویې جرګې د ملاتړ په اړه د متحده ایالاتو له اعلامیې مننه کوم، موږ له امریکا سره بنسټېزې اړیکې لرو.
روان کال په افغانستان کې د ټاپي پروژې کار پیلیږي.
د جرګې په لړ کې د ولسمشر د وینا پر مهال فریکي شخړه هم وشوه
ښاغلي غني تر دې وړاندې ویلي، دی د اساسي قانون او جزا قانون په اساس د ۴۰۰ طالب بندیانو د خوشې کولو صلاحیت نه لري او د دغو زندانیانو په اړه به د سولې مشورتي لویه جرګه تصمیم نیسي.
استاد سیاف د د مشورتي لويې جرګې په اړه وايي د جرګې غړي بايد د سولې پر وړاندې پراته خنډونه لرې کړي او داسې تصمیم ونیسي چې د سولې له پروسې سره مرسته وکړي او پر وړاندې یې شته خنډونه ختم شي.
د افغانستان حکومت د تېرو ۱۱ کلونو راپدېخوا ۳ نورې مشورتي جرګي هم تر سره کړي چې دوه یې د سولې پروسې اړوند وې.
جرګه د افغانستان په تاریخ کې یو پخوانی دود دی چې اوس یې سیاسي رنګ اخیستی دی.