د فوټبال افغان لوبډله سختې لوبې په مخ کې لري
محمود خان منندوی
په اسيا کي د قطر د ۲۰۲۲ نړۍ وال جام له پاره د دوهم پړاو پچه اچوونه وشوه؛ افغان لوبډله سختې لوبې په مخ کې لري.
اسيايي هیوادونو د قطر د ۲۰۲۲م کال د فوټبال د نړۍ وال جام له پاره خپل سیالان وپيژندل. د قطر نړۍ وال جام ته د دوهم غوراوي پړاو پچه اچوونه نن ماسپښين د کابل پر وخت ۰۱:۳۰ بجه ترسره شوه، چې ۴۰ لوبډلې دې جام ته د لار موندني له پاره یو د بل پر وړاندې لوبيږي.
په دغه ۴۰ لوبډلو کي د فیفا په درجه بندۍ کې ۳۴ مخکښې اسیايي لوبډلې او شپږ لوبډلې هم د لومړي پړاو څخه شتون لري، چې بنګله دېش، کمبوديا، ګوام، مالیزيا، سریلانکا او منګولیا دي. دغه لوبي د تګ او راتګ پړاونه لري، چې پر ۸ ګروپونو ویشل شوي دي او په هر ګروپ کي ۵ لوبډلې دي. په مجموعه کي ۱۲ لوبډلي بل پړاو ته لاره پيدا کوي، چې په دې لوبډلو کې د اتو سرو ګروپونو څخه څلور غوره لوبډلې هم پکې شاملي دي. دغه ۱۲ لوبډلې په مستقیم ډول د اسیا د ۲۰۲۳ م کال د ملتونو جام ته هم لاره پيدا کوي، چې په چین کې ترسره کېږي.
د غوراوي پړاو دغه لوبې د روان میلادي کال د سپټمبر پر پنځمه نېټه پيلېږي او د ۲۰۲۰ م کال د جون پر اتمه نېټه پایته رسيږي.
نړۍ وال جام ته د غوراوي پړاو اته ګروپونه:
د A ګروپ: ګوام، مالډیف، فیليپين، سوریه او چین
د B ګروپ: نیپال، کویټ، چين ټايپي، اردن او اسټرالیا
د C ګروپ: کمبودیا، هنګ کانګ، بحرین، عراق او ایران
د D ګروپ: سنګاپور، یمن، فلسطین، ازبکستان او عربستان.
د E ګروپ: بنګله دېش، افغانستان، عمان، هند او قطر.
د F ګروپ: منګولیا، میانمار، تاجکستان، قرغزستان او جاپان.
د G ګروپ: اندونیزیا، مالیزیا، ټایلنډ، ویټنام او عربي متحده امارات.
د H ګروپ: سریلانکا، ترکمنستان، شمالي کوریا، سهیلي کوریا او لبنان.
په دې پړاو کي د قطر د شتون علت دادی، چي دغه لوبې د اسیا د ملتونو جام له پاره اغیز لري.
بله جالبه نقطه په دې پچه اچوونه کې دا ده، چې یمن او عربستان په یوه ګروپ کي دي او دا دواړه هیوادونه یو بل سره سخت سیاسي اختلافات لري.
