د زمبابوې کریکټ بورډ د فساد او درغلۍ په تور لغوه شو
خان وزیر عابد
د زمبابوې حکومت له هغې وروسته د زمبابوې کریکټ بورډ اداره لغوه او وتړله چې پکې د فساد او درغلۍ ادعاوې وشوې.
د زمبابوې سپورټ ایجادونکي کمیسون لخوا تیره اوونۍ زمبابوې کریکټ بورډ ته حکم شوی وو چې تر هغې د بورډ د مشرتابه لپاره انتخابات ترسره نکړي، تر څو چې په بورډ کې د فساد په اړه پلټنې نه وي ترسره شوي، خو بورډ له امر سرغړونه وکړه او وتړل شو.
د زمبابوې د سپورټ ایجادي کمیسون چارواکو ویلي، د دوی هدف همدا و چې زمبابوې کریکټ بورډ ته د ای سي سي لخوا راتلونکي پيسې، د هغوی د ناسمې کارونې او همداشان په بورډ کې دننه د درغلیو پلټنه وکړي.
د یاد کمیسون لخوا د بورډ ځینې غړي چې په هغې کې اجرایوي ډایریکټر هم شامل دی، له دندو لیرې کړل شوي دي.
د کمیسون لخوا یوه موقتي کمیټه هم جوړه شوي چې مشري یې د زمبابوې کریکټ بورډ پخواني غړي ډویډ اېلمن ته ورسپارل شوې او د کریکټ چارې به پرمخ وړي.
زمبابوې چې د کریکټ نړیوالې شورا لخوا بشپړ غړیتوب لري او د یادې شورا لخوا به په دې موضوعاتو راتلوونکي میاشت په عمومي ناسته کې پرې خبرې وشي.
