افغانستان له بنګله دېش څخه تمریني مسابقه وګټله
تاند- د افغانستان د کرکټ ملي لوبډلې له بنګله دېش سره تر ۳ شل اوره مسابقو مخکې لومړنۍ تمریني مسابقه له بنګالي لوبغاړو په نسبتاً اسانه وګټله.
د جمعې په ورځ د افغانستان او بنګله دېش د الف لوبډلو ترمنځ د سیالۍ لومړی بیټنګ بنګالي لوبغاړو پیل کړ.
دوی په ۲۰ اورونو کې ۱۴۵ منډې جوړې کړای شوې.
د بنګالي لوبغاړو لپاره مصدق حسین ۳۸، مشفیق الرحمن ۲۷ او شکېب الحسن ۱۹ منډې وکړې.
خو افغان لوبغاړو دا هدف په اتلسم اوور کې پوره کړ او په ۸ ویکټونو یې لوبه وګټله.
حضرت الله ۶۹ منډې وکړې، محمد نبي ۳۲ او شفیق الله شفق ۲۸ منډې وکړې او دواړه تر پایه ونه سوځېدل.
ټاکل شوې ده چې سبا /یکشنبه/ د افغانستان او بنګله دېش په خپله لومړۍ شل اوره مسابقه کې مخامخ شي.
