نولس کلونو جام: پاکستان له افغانستانه درېم مقام واخیست
تاند- باران او د افغان لوبډلې بې پروایۍ مرسته وکړه چې د پاکستان د کرکټ د نولس کلونو لوبډله د نولس کلونو د نړیوال جام درېم مقام ترلاسه کړي.
نن /پنجشنبه/ د درېم مقام لپاره د افغانستان او پاکستان مسابقه لغوه شوه او د دې لپاره چې په لومړي پړاو کې د پاکستان لوبډله د ګروپ د لومړي ټیم په توګه نیمه پایلوبې ته وتلې وه، درېم مقام ورکړل شو.
د افغانستان د کرکټ ټیم په سرلوبو کې د پاکستان په شمول تکړه لوبډلې ماتې کړې خو د سرلوبو وروستۍ مسابقه یې د ګروپ تر ټولو پر کمزوري ټیم آیرلنډ په ۴ منډو ښايي په دې فکر چې په هر حال بل پړاو ته وځي، وبایلله.
دې ماتې له یوې خوا د افغانستان لوبډله د استرالیا په شان د بل ګروپ تر ټولو له غښتلي ټیم سره مخامخ کړه، او له بلې خوا یې درېم مقام ورڅخه واخیست.
ډېره هیله وه چې افغانستان به د ۲۰۱۸ د نولس کلونو نړیوال جام خپل کړي.
