په ننګرهارکې د سپینغر کرکټ اکاډمي د نامعلومو کسانو لخوا ویجاړه شوې ده
خبریال: فضل الرحیم رحیمي:
تېره شپه نامعلومو کسانو د ننګرهار د سپینغر کرکټ اکاډمي، چې د بهسود پله ترڅنګ موقعیت لري، پیچونه ویجاړ کړل.
د دې اکاډمۍ د یوه ساتونکي جبار په وینا، دغه پیچونه هغه مهال وران شول چې تېره شپه یوولس نیمې بجې (۱۱:۳۰) څلور تنه، چې وسلې هم ورسره وې، د میدان له شاتنۍ برخې اکاډمۍ ته داخل شول او د پیچونو په ورانولو یې پیل وکړ.
ساتونکی وایي«کله چې زه ورنږدې شوم نو هغه کسانو د تمانچې لټ تیر کړ او راته یی وویل چې مخکې رانشې.»
دی زیاتوي، دغه څلور کسان د اکاډمۍ د پیچونو او جالونو له خرابولو ورورسته لاړل.
د دې اکاډمۍ د مسوول همایون عمر په وینا دغه کسان د دوی د اکاډمۍ نه بلکې د افغانستان د کرکټ دښمنان دي او دا ډول کسان نه غواړي چې کرکټ او اکاډمي پرمخ لاړ شي.
عمر زیاته کړه، په دې اکاډمۍ کې د ملي لوبغاړو په ګډون اوسمهال (۱۷۰) کسان په تمرینونو بوخت دي.
ده همداراز وویل، دا ډول کړنې د دوی فعالیتونه نشي درولی.
