د افغانستان ۱۹ کلنو د اسیايي سیالیو اتلولي وګټله
تاند- د افغانستان د نولس کلنو کرکټ لوبډلې د اسیايي جام په پایلوبه کې پاکستان ته په ماتې د اتلولۍ کپ وګوټ.
تنکیو افغان لوبغاړو په پایلوبه کې د ۷ لوبغاړو د سوځېدو په بدل کې ۲۴۹ منډې هدف وټاکه. خو د پاکستان ټول لوبغاړي په ۲۲ اوور او یو توپ په داسې حال کې وسوځېدل چې صرف ۶۳ منډې یې کړې وې.
د افغان نولس کلنو په منځ کې اکرم عليخېل ۱۰۷، رحمان ګوربز ۴۰، ابراهیم ځدراڼ ۳۶ او دروېش ۱۸ منډې وکړې.
اکرم علیخېل، چې په پایلوبه کې یې ۱۰۷ منډې وکړې، د پایلوبې غوره لوبغاړی او مجیب ځدراڼ، چې په پایلوبه کې ۵ او په ټول تورنمنټ کې ۲۰ لوبغاړي وسوځول، د ټورنمنټ غوره لوبغاړي وپېزندل شول.
افغانانو په ټولنیزو رسنیو کې خپلې لوبډلې ته د بري مبارکي ویلې او په عین حال کې یې دا د پاکستان لپاره تاریخي ماته بللې ده.
افغان لوبډلې په مالیزیا کې د اسیايي جام په سر لوبو کې هم پاکستان ته په زیات توپیر ماته ورکړې وه.
په دې سیالیو کې افغانستان، پاکستان، هند، سریلانکا، بنګله دېش، متحده عربي امارات، نیپال،او مالیزیا ګډون درلود چې په لړ کې یې افغان لوبډلې یوازې یوه ماته وکړه.
