د افغانستان د کرکټ ملي لوبډلې په هند کې تمرینونه پیل کړل
خبریال: فضل رحیم رحیمي- د افغانستان د کرکټ ملي لوبډلې د څو نړیوالو سیالیو لپاره د تیاري لپاره په هند کې تمرینونه پیل کړل.
د دغه تمریناتي کمپ په ترڅ کې به افغان لوبغاړي د توپوهنې، توپ اچونې، توپ نیونې او فزیکي پیاوړتیا په برخه کې د اړونده روزونکو تر لارښونې لاندې کار وکړي.
د افغانستان کرکټ لوبدله به لس ورځې په هند کې تمریناتي کمپ ولري او وروسته به د ویسټ انډیز په لور راونه شي.
ټاکل شوې ده چې ملي لوبډله له ویست انډیز سره درې شل اوريزې او درې یوه ورځنۍ سیالۍ وکړي.
د دې مسابقو لومړۍ شل اوريزه لوبه به د راتلونکي جون د میاشتې په دوهمه نيټه پېل وي چې کرکټ بورډ ورته څه موده مخکې لوبډله هم اعلان کړه.
د یادونې ده چې افغان کرکټ لوبډلې تر دې وړاندې ویسټ انډيز ټیم ته په شل اوريز نړیوال جام کې ماته ورکړې وه.
د افغانستان د کرکټ ملي ټیم به په جولای میاشت کې بریتانیا ته لاړ شي.
